काठमाडौं । काठमाडौं उपत्यकामा कोरोना संक्रमण बढेपछि तीन जिल्लाका सीडीओहरू आ–आफ्नो जिल्लाका सरोकारवाला निकायहरूसँग छलफलमा जुटेका छन् । काठमाडौं, भक्तपुर र ललितपुरका सीडीओ संक्रमण रोकथामबारे कस्तो प्रावधान लागु गर्ने भन्नेबारे छुट्टाछुट्टै छलफलमा जुटेका हुन् ।

काठमाडौंका प्रमुख जिल्ला अधिकारी गोविन्दप्रसाद रिजालले आ–आफ्नो जिल्लाका सरोकारवालाहरूसँग आन्तरिक छलफलमा जुटेको जानकारी दिए ।

यस्तै, जिल्ला प्रशासन कार्यालय ललितपुरले आज दिउँसो सरोकारवालासँग बढ्दो संक्रमणदर र खोपबारे छलफल गर्ने भएको छ । ललितपुरका प्रमुख जिल्ला अधिकारी घनश्याम उपाध्यायले दिउँसो २ बजे खोप समितिको बैठक बोलाइएको जानकारी दिए । खोप समितिको बैठकमै ललितपुरको बढ्दो संक्रमणदरबारे केही समीक्षा हुने पनि उनले बताए ।

जिल्ला प्रशासन कार्यालय भक्तपुरले पनि संक्रमण रोकथाम गर्न आवश्यक तयारीसहित जिल्लाका सरोकारवालाहरूसँग आन्तरिक छलफलमा जुटेको जनाएको छ ।

भक्तपुरकी प्रमुख जिल्ला अधिकारी रुद्रादेवी शर्माले खोप, भिडभाड नियन्त्रण, बढ्दो संक्रमणदरबारे छलफल भइरहेको बताइन् । ‘‘तीन जिल्लाका सीडीओ संयुक्त रूपमा बैठक बसेर आवश्यक निर्णय गर्ने भन्नेबारे छलफल भइसकेको छ । अब कोभिड–१९ संकट व्यवस्थापन समन्वय केन्द्र (सीसीएमसीसी)को शुक्रबारको निर्देशन आउनेबित्तिकै तत्काल कदम चाल्छौँ,” प्रजिअ शर्माले भनिन् ।

तीन जिल्लाका प्रजिअले सीसीएमसीसीको निर्देशन कार्यालयमा आइसकेपछि र विभिन्न सरोकारवाला निकायसँगको छलफलपछि संयुक्त रूपमा तीन जिल्लाका प्रजिअको बैठक बस्ने बताएका छन् । देशभर कोरोना संक्रमण बढ्न थालेपछि शुक्रबार सीसीएमसीसीको बैठक बसेको थियो ।

प्रजिअहरूले ‘स्मार्ट लकडाउन’, ‘लकडाउन’ र निषेधाज्ञा जारी गर्नेबारे भने तत्काल तयारी नगरेको पनि बताएका छन् । सीडीओहरूको संयुक्त बैठकले भिडभाड हुने क्षेत्र नियन्त्रण र व्यवस्थापनको प्रावधान ल्याइने जनाइएको छ ।

प्रजिअले खोप व्यवस्थापन, स्वास्थ्य मापदण्ड पालना गराई कोरोना रोकथाम गर्न स्वास्थ्य तथा जनसंख्या मन्त्रालय र गृह मन्त्रालयसँग समन्वय गर्दै आएका छन् ।