काठमाडौं । सहिद स्मारक ‘ए’ डिभिजन लिग फुटबलमा सातौँ चरणसम्म अपराजित रहेको संकटा क्लबले शुक्रबार सातदोबाटो युथ क्लबविरुद्ध खेल्दै छ । संकटा आज नवप्रवेशी क्लबविरुद्ध विजयी नतिजा निकाल्दै उपाधि होडमा शीर्ष स्थानका मच्छिन्द्र क्लब र मनाङ–मर्स्याङ्दी क्लबलाई दबाबमा राख्न चाहन्छ ।

पछिल्लो समय खराब लयबाट गुज्रिएको सातदोबाटो आज पुनरागमनको लक्ष्यमा हुनेछ । सातदोबाटोका मुख्य प्रशिक्षक मेघराज केसी मातृशोकका कारण आज पनि टच लाइनमा हुने छैनन् । केसीको स्थान सुरज महर्जनले लिएका छन् । महर्जनले मुख्य प्रशिक्षक केसीको अभाव खड्किएको बताए ।

‘‘उहाँ नहुँदा हाम्रो प्रशिक्षणमा असर त गरेको छ । तथापि, हामीले उहाँसँग सम्भव भएसम्म भेटेर र नभए फोनमै भए पनि सल्लाह–सुझाव लिएका छौँ,’’ सहायक प्रशिक्षक महर्जनले भने, ‘‘संकटाविरुद्धको खेल हाम्रो लागि एकदमै महत्त्वपूर्ण छ । उनीहरू राम्रो टिम हो र हामीले त्यहीअनुसार तयारी गरेका छौँ ।’’

सातदोबाटोमा अजयी मार्टिन्स हुने छैनन् । मार्टिन्सले लिगमा चार गोल गरिसकेका छन् । दुई पहेँलो कार्डका कारण उनी संकटाविरुद्धको खेलमा हुने छैनन् । उनको अभाव आज सातदोबाटोलाई हुनेछ ।

‘‘विदेशी खेलाडी मार्टिन्स नहुँदा हामीलाई गाह्रो त हुन्छ,’’ प्रशिक्षक महर्जनले भने, ‘‘तर, उनी नभएको अवस्थामा हामीले त्यहीअनुसार तयारी गरेका छौँ । उनको स्थानमा नेपाली खेलाडीले खेल्नेछन् ।’’

सातदोबाटो अहिले आठ अंकका साथ आठौँ स्थानमा छ । सातदोबाटोले सातमध्ये दुई खेलमा जित, दुई बराबरी खेलेको छ भने तीन खेल हारेको छ । संकटा भने तीन खेलमा जित र चार खेलमा बराबरी खेल्दै १३ अंकका साथ तेस्रो स्थानमा छ । त्यो शीर्ष स्थानको मच्छिन्द्रभन्दा चार अंकले पछाडि हो ।

संकटा आज सातदोबाटोलाई हराउँदै मनाङसँग अंक बराबरी गर्न चाहन्छ । संकटाका रक्षक अर्नेष्ट टेम्पी पनि चोटका कारण आजको खेलमा हुने छैनन् । टेम्पी आजको खेलमा मात्र नभई तीन महिना मैदान बाहिर हुनेछन् । संकटाले उनको स्थानमा भारतीय खेलाडी झिकाइसकेको छ । तथापि, एन्फामा दर्ता प्रक्रियामा रहेका कारण उनी आज खेल्नेमा शंका छ ।

संकटाका सहायक प्रशिक्षक राजकुमार केसीले टेम्पी नहुँदा टिमलाई असर पर्ने बताए । तथापि, उनले सातदोबाटोका मार्टिन्स नहुने भएकाले आजको खेलमा धेरै दबाब झेल्न नपर्ने बताएका छन् ।

‘‘टेम्पी नहुँदा त हामीलाई घाटा नै हुन्छ । तर, सातदोबाटोको पनि मार्टिन्स घाइते भएकाले बराबरजस्तै हुन्छ,’’ प्रशिक्षक केसीले भने ।

सातदोबाटो पछिल्लो खेलमा हिमालयन शेर्पा क्लबसँग १–० ले पराजित भएको थियो भने संकटाले च्यासल युथ क्लबसँग गोलरहित बराबरी खेलेको थियो ।

एपीएफ र जावलाखेल आमने–सामने
आजै दोस्रो खेलमा सशस्त्र प्रहरी बल (एपीएफ)ले जावलाखेल युथ क्लबसँग प्रतिस्पर्धा गर्नेछ । एपीएफ ६ अंक जोडेर दशौँ स्थानमा छ । जावलाखेल सात अंकका साथ नवौँ स्थानमा छ ।

एपीएफका सहायक प्रशिक्षक रत्न महर्जनले अघिल्ला खेलमा स्कोर निस्किए पनि गोल रोक्न नसक्दा नतिजा हातबाट फुस्किएको बताए । उनले त्यसलाई ध्यानमा राखेर प्रशिक्षण गरिएकाले आगामी दिनमा राम्रो नतिजा निस्कने विश्वास व्यक्त गरे ।

त्यस्तै, जावलाखेलका प्रशिक्षक किशोर केसीले ‘टेक्निकल्ली र ट्याक्टिकल्ली’ रूपमा एपीएफभन्दा आफ्नो टिम राम्रो भएको बताए । तथापि, उनले फिनिसिङको समस्या अझै समाप्त नभएको स्वीकार गरे । 

‘‘अझै पनि हामीलाई भाग्यले साथ दिएको छैन । हानेका बलहरू बारमा लाग्न छाडेका छैनन्,’’ केसीले भने, ‘‘एपीएफले पनि विदेशी खेलाडी राखेको छ । टिम राम्रो बनेको छ । तर, हामी उनीहरूभन्दा टेक्निकल्ली र ट्याक्टिकल्ली राम्रा छौँ । त्यो शुक्रबारको खेलले पनि प्रमाणित हुनेछ ।’’