![भेरी अस्पतालको क्वार्टरमा एकै परिवारका चारजनाको मृत्यु, तीनको अवस्था गम्भीर](https://12khari.top/uploads/posts/bheri hospital banke1620727063.jpg)
काठमाडौं । बाँकेको नेपालगन्जस्थित भेरी अस्पतालको क्वार्टरमा गए राति एकै परिवारका चारजनाको मृत्यु भएको छ । क्वार्टरमा निस्सासिएर मृत्यु भएको जिल्ला प्रशासन कार्यालय बाँकेले जनाएको छ ।
बाँकेका प्रमुख जिल्ला अधिकारी सूर्यबहादुर खत्रीले कालिकोटको खडाचक्र नगरपालिका–६ का धनप्रसाद भट्टराई, उनकी आमा कोकिला, दिदी नन्दकली र तीन महिनाका छोरा एक्सन भट्टराईको मृत्यु भएको जानकारी दिए । धनप्रसाद अस्पतालमा सहयोगीका रूपमा काम गर्दै आएको पनि प्रजिअ खत्रीले बताए ।
उक्त क्वार्टरको एउटै कोठामा उनीहरू चारसहित एकै परिवारका सातजना सुतेका थिए । तीनजनाको अवस्था गम्भीर छ ।
‘‘धनप्रसादकी श्रीमती सुशीला होसमै छिन् । उनका तीन वर्षीय छोरा विवश र भाइ नरेन्द्र भट्टराईको अवस्था गम्भीर छ । तीनजनाको भेरी अस्पतालमै उपचार भइरहेको छ,” उनले बाह्रखरीसित भने ।
![Global Ime bank](https://baahrakhari.com/uploads/bigyaapan/30885600.gif)