काठमाडौं । धितोपत्र बोर्डको अध्यक्ष नियुक्तिका लागि सिफारिस समिति बनेको छ । मन्त्रिपरिषद्को निर्णयअनुसार बोर्डको अध्यक्ष सिफारिसका लागि समति गठन गर्ने निर्णय भएको पत्र आएको अर्थमन्त्रालयका प्रवक्ता रितेश शाक्यले बताए ।

यसअघि अर्थमन्त्रीस्तरीय निर्णयबाट विज्ञ सदस्यमा नारायण पौडेल रहने गरी योजान आयोगको उपाध्यक्ष विश्वनाथ पौडेलको संयोजकत्वमा अर्थसचिव मधु मरासिनी सदस्य रहेको अध्यक्ष सिफारिस समिति बनेको थियो । उक्त समितिले अध्यक्षका लागि ऐन अनुसारको मापदण्ड बनाएर आवेदन माग गरेको थियो । जसमा १२ जनाको आवेदन परेको थियो ।

तर, सो समिति ऐन अनुसार नबनेको भन्दै त्यसलाई खारेज गरेर नयाँ समित गठनका लागि मन्त्रिपरिषद्मा सिफारिस गरिएको थियो । मन्त्रिपरिषद्ले सो समितिलाई खारेज नयाँ समिति गठन गर्ने निर्णय गरेको थियो । 

पुनः गठन भएको समितिमा विज्ञ सदस्य नारायण पौडेलको स्थानमा डा. जीवनाथ धिताल आएका छन् ।

धितोपत्र सम्बनन्धी ऐन अनुसार समितिको संयोजक योजना आयोगको सम्बन्धित क्षेत्र हेर्न सदस्य र तीन सदस्यीय समितिमा अर्थसचिव पनि रहने व्यवस्था छ । जसअनुसार सिफारिस समितिको संयोजन योजना आयोगका उपाध्यक्ष पौडेलले नै गर्ने छन् । अर्थसचिव मरासिनी सदस्य रहने छन् ।

धिताल नेपाल स्टक एक्सचेञ्जको पूर्व अध्यक्ष हुन् । प्रचण्ड नेतृत्वको सरकारका बेला धिताल नेप्सेको अध्यक्ष नियुक्त भएका थिए ।

उनी नेप्सेको सीईओ सिफारिस समितिमा पनि छन् ।

बुक बिल्डिङ विधिबाट धितोपत्रको सार्वजनिक निष्कासन प्रक्रियामा रहेको सर्वोत्तम सिमेन्टको सेयर खरिद प्रकरणमा मुछिएपछि तत्कालीन अध्यक्ष भीष्मराज ढुङ्गाना बर्खास्तीमा परेसँगै बोर्डको अध्यक्ष रिक्त छ । सोही प्रकरणमा मुछिएको नेप्सेको प्रमुख कार्यकारी अधिकृतले पनि राजीनामा दिँदा नेप्से पनि नेतृत्व विहीन छ ।

नेप्सेको सीईओ नियुक्तिका लागि पनि आवेदन माग भइसकेको भएपनि बोर्ड अध्यक्ष नियुक्ति प्रक्रिया अन्यौलमा पर्दा नेप्सेको सीईओ पनि नियुक्त हुन सकेको छैन ।