काठमाडौं । नेपाल कम्युनिस्ट पार्टी (एकीकृत समाजवादी) का अध्यक्ष माधवकुमार नेपालले नेकपा (एमाले) को नेतृत्वमा लोकतान्त्रिक चरित्र नभएको आरोप लगाएका छन् । राष्ट्रिय जन सांस्कृतिक महासङ्घले आज काठमाडौं आयोजना गरेको सांस्कृतिक कार्यक्रममा उनले एमालेले फरक मत राख्नेलाई अपमान गर्ने गरेकाले आफूहरूले गरेको विद्रोह सही भएको बताएका हुन् ।

“एमालेबाट विद्रोह गर्नुको कारण बुझ्न चितवनमा भइरहेको अधिवेशन पर्याप्त छ,” उनले भने, “एमालेमा फरक मत राख्नेहरूको अपमान भइरहेको छ । जनताको बहुदलीय जनवादलाई उपहास गरेको छ, त्यसमा विचार तथा बहसको व्यवस्थापन गर्न चाहदैन ।”  

अध्यक्ष नेपालले लोकतान्त्रिक शक्तिबीच गरिएको गठबन्धनले संविधानको रक्षा र जनताको क्रान्तिबाट प्राप्त भएको अहिलेको व्यवस्थालाई संरक्षण गरेकाले यसलाई निरन्तरता दिइने बताए । पूर्वप्रधानमन्त्रीसमेत रहेका अध्यक्ष नेपालले आफ्नो पार्टी समानता र न्यायको यात्रामा अघि बढेको उल्लेख गर्दै समाजवादले जनताको सामाजिक तथा आर्थिक रूपान्तरण गर्ने विश्वास व्यक्त गरे । रासस