काठमाडौं । नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड'ले संविधान खारेज गर्दै राजतन्त्र फर्काउने उद्देश्यका साथ गरिएको प्रतिनिधिसभा विघटनलाई जनताले विफल पारेको बताएका छन् । मंगलबार काठमाडौंमा अखिल नेपाल शिक्षक संगठन एकताको दोस्रो राष्ट्रिय सम्मेलनलाई सम्बोधन गर्दै प्रचण्डले प्रतिक्रियावादीहरूले संविधानलाई खारेज गर्ने तथा राजतन्त्रका साथ ०१७ साल फर्काउन गरेको प्रतिनिधिसभा विघटन असफल भएका बताएका हुन् ।

अहिले पनि केहीलाई आन्दोलनबाट प्राप्त परिवर्तन मन नपरेको भन्दै उनले सबैले संविधानलाई जोगाउनुपर्ने बेला आएको बताए । प्रचण्डले नेपालको राजनीति परिवर्तनको प्रक्रिया चक्रव्यूहमा पुगेको र यसलाई निकाल्नुपर्ने बताए । 

त्यस्तै उनले निर्वाचन प्रणाली र शासकिय स्वरूप तथा पहिचानका विषयमा संविधान संशोधन गर्नुपर्ने बताए । उनले संघीयता विरोधी, मधेसी जनता र पहिचान विरोधी केपी ओली नै भएको पनि बताए ।