काठमाडौं । स्टेभन बर्गविन र मेम्फिस डिपाएको गोलमा नेदरल्यान्ड्सले मंगलबार राति नर्वेलाई २–० ले हराउँदै विश्वकपमा स्थान पक्का गरेको छ । नेदरल्यान्ड्स युरोपियन विश्वकप छनोटमा समूह ‘जी’ को शीर्ष स्थानमा रहेर विश्वकप पक्का गरेको हो । सोही समूहबाट टर्कीले प्लेअफमा स्थान पक्का गर्यो । 

नेदरल्यान्ड्सका प्रशिक्षक लुइस भान गालले ‘स्काई बक्स’मा बसेर खेल हेरेका थिए । उनी आइतबार घाइते भएका थिए । पिठ्युमा चोट बेकेका भान गालले त्यहीबाट डकआउटमा रहेका सहायक प्रशिक्षक हेन्क फ्रासरलाई निर्देशन दिएका थिए । 

नदेरल्यान्ड्सले घरेलु मैदानमा बर्गविनको गोलबाट ८४औं मिनेटमा अग्रता लिएको थियो । डिपाएले इन्जुरी समयमा अग्रता बनाएका थिए । जितपछि समूह ‘जी’ मा रहेको नेदरल्यान्ड्सले १० खेलबाट २३ अंक जोडेको छ । जुन दोस्रो स्थानको टर्कीभन्दा दुई अंकले माथि हो । 

युरोपियन छनोट प्रतियोगिताबाट समूहको शीर्ष टोलीले मात्र सिधै विश्वकपमा स्थान बनाउनेछन् । दोस्रो हुनले प्लेअफ खेल्नुपर्ने हुन्छ । समूह ‘जी’मा टर्कीले प्लेअफ खेल्नेछ । 

टर्कीले मोन्टेनेग्रोलाई २–१ ले हराएको थियो । सोही समूहमा रहेको लात्भियाले जिब्राल्टरलाई ३–१ ले हरायो ।