काठमाडौं । भाटभटेनी सुपरमार्केट टंगालमा नेपालकै पहिलो ११ तले स्मार्ट पार्किङ आजदेखि सञ्चालनमा आएको छ ।

११ तलाको भर्टिकल पार्किङको आइतबार भाटभटेनीका अध्यक्ष मीनबहादुर गुरुङले औपचारिक उद्घाटन गरेका थिए ।

करिब चार आनामा बनेको ११ तले पार्किङमा ४४ वटा गाडी अटाउछन् । निर्माण सुरु भएको तीन महिनामै उक्त पार्किङ तयार गरिएको थियो । “हामीले तिहारअघि नै ट्रायल गरेका थियौँ,” भाटभटेनी सुपरमार्केटका प्रमुख सञ्चालन अधिकृत (सीओओ) पानु पौडेलले भने, “औपचारिक पूजासहित उद्घाटन गरिएको छ ।”

चिनियाँ प्रविधिमा तयार पारिएको पार्किङ भारतीय प्राविधिकले निर्माण गरेका थिए । पार्किङको समस्याले गर्दा यस्तो स्मार्ट पार्किङ निर्माण गर्नुपरेको भाटभटेनीले जनाएको छ ।

“तपाईंले ल्याएको गाडी पार्किङस्थलमा पुगेपछि एउटा कार्ड प्राप्त हुन्छ,” पौडेलले स्मार्ट पार्किङको विशेषताबारे जानकारी गराउँदै भने, “कार्ड स्क्यान गरेपछि कुन ठाउँमा खाली छ त्यही ठाउँमा लगेर गाडी पार्किङ हुन्छ । पछि स्क्यान गरेपछि गाडी तल झर्छ । यसमा कुनै झञ्झट हुँदैन ।”

हाइड्रोलिक सिष्टमबाट सञ्चालित ‘स्मार्ट पार्किङ’ले पार्किङमा देखिएको समस्या तत्कालका लागि समाधान हुने भाटभटेनीले जनाएको छ ।

टंगालको भाटभटेनीमा यसअघि करिब ७५ वटा गाडी पार्किङ गर्न सकिने भए पनि अब थप ४४ वटा गर्न सकिने पौडेलले जानकारी दिए ।

“काठमाडौं उपत्यकाका अन्य स्थानमा पनि हामीले निर्माणको तयारी गरेका छौँ,” उनले भने, “अनामनगर, महाराजगञ्ज, सातदोबाटोमा निर्माण गर्ने तयारी छ ।”