जनकपुरधाम । निर्वाचनको चार वर्षपछि महोत्तरीको एउटा वडाको मतगणना पुनः भइरहेको छ । महोत्तरीको मनरा सिस्वा नगरपालिका १० को मतगणना आइतबार दिउँसोदेखि उच्च अदालत जनकपुरमा भइरहेको हो । 

उच्च अदालतका रजिष्ट्रार खड्गराज अधिकारीका अनुसार अदालतको आदेशअनुसार पुनः मतगणना भइरहेको छ । 

दुवै उमेदवारको समान मत आएपछि गोलाप्रथाबाट नतिजा घोषणा गरिएको थियो । 

पछि पराजित उमेदवारले मुद्दा दर्ता गरेपछि अदालतले विवाद रहेको ठाउँमा पुनः मतगणना गर्ने आदेश दिएको छ । सोही आदेशअनुसार आज पुनः मतगणना भइरहेको छ । 

०७४ असोज २ गते स्थानीय तहको निर्वाचन भएको थियो । निर्वाचन भएको ६ दिनपछि त्यहाँको नतिजा सार्वजनिक गरिएको थियो । 

स्वतन्त्र उमेदवार रमेशकुमार राय र नेपाली कांग्रेसका अरुणकुमार चौधरीबीच कडा प्रतिस्पर्धा देखिएको थियो । अन्तमा दुवै उमेदवारले समान २ सय ६७ मत ल्याएपछि गोला प्रथाबाट चौधरी निर्वाचित भएको निर्वाचन अधिकृत आमबहादुर बानियाँले घोषणा गरेका थिए ।

पराजय अस्वीकार गर्दै रायले अदालतमा मुद्दा दर्ता गरेको थियो । उच्च अदालतले ०७५ असार २१ गते १५ दिनभित्र पुनः मतगणना गर्न आदेश दिएको थियो । उच्च अदालतको आदेशपछि निर्वाचित चौधरी सर्वोच्च अदालत पुगेका थिए । सर्वोच्चले ०७७ चैत ६ गते उच्च अदालत जनकपुरको आदेशलाई सदर गरिदियो । 

मुद्दा दर्ता गरेका उमेदवार रायले राति विद्युत् गएको बेला निर्वाचन अधिकृतले तीनवटा आफ्नो भोट अर्का उमेदवारमा समावेश गरेको आरोप लगाएका छन् ।