काठमाडौं । वाग्मती प्रदेशकी मुख्यमन्त्री अष्टलक्ष्मी शाक्यले अध्यादेश ल्याएर दल विभाजन गर्ने काम अन्त्यन्तै दुःखद भएको बताएकी छन् ।

बिहीबार वाग्मती प्रदेशसभाको बैठकमा आफूलाई विश्वासको मत दिन आग्रह गर्दै उनले आफ्नै पार्टीका अध्यक्ष केपी शर्मा ओलीले दल विभाजन गर्ने गरी अध्यादेश ल्याउँदा आफूले विरोध गरेको र वर्तमान सरकारले ल्याएको दल विभाजनसम्बन्धी अध्यादेशले पार्टीहरू विभाजित भएको बताइन् ।

गएको भदौ २ गते तत्कालीन मुख्यमन्त्री तथा संसदीय दलका नेता डोरमणि पौडेलले मार्गप्रशस्त गरेपछि आफू संसदीय दलको नेता चुनिएको भन्दै उनले प्रदेश प्रमुखबाट ठूलो दलको नेताको रूपमा मुख्यमन्त्री बनेको उल्लेख गरिन् ।

आफ्नो दल विभाजन भएर आफूले विश्वासको मत लिनुपर्ने भएकाले सांसदहरूलाई स्वविवेक प्रयोग गर्न उनले आग्रह गरिन् । उनले आफूले नैतिकता र इमानदारितामा आँच आउने कुनै काम नगरेको दाबी पनि गरिन् ।