काठमाडौं । अविरल वर्षाका कारण पहिरो जाँदा हुम्लामा एकै परिवारका  चारजनाको मृत्यु भएको छ । दुईजना बेपत्ता छन् । मंगलबार राति खार्पुनाथ गाउँपालिका–५, खर्पेलगाउँमा एउटा घर पुरिँदा चारजनाको मृत्यु र दुईजना बेपत्ता भएका हुन् ।

जिल्ला प्रहरी कार्यालय हुम्लाका अनुसार खर्पेलगाउँस्थित धनवीरे शाहीको घर पहिरोले पुरिएको छ । पहिरोमा पुरिएर ५५ वर्षीय कलबहादुर शाही, उनकी श्रीमती ४० वर्षीया आशा शाही तथा उनका छोराहरू पाँच वर्षीय भुमेश शाही र तीन वर्षीय जसबहादुर शाहीको मृत्यु भएको प्रहरीले जनाएको छ ।

जिल्ला प्रहरी कार्यालय हुम्लाका डीएसपी हेमन्त शर्माले चारजनाको शव फेलापरेको जानकारी दिए । ‘‘हाम्रो प्रहरी टोली घटनास्थलमै छ । अहिलेसम्म चारजनाको शव भेटिएको छ । अरू दुईजना खोजिरहेका छौँ । ६५ वर्षीय धनवीरे शाही र १३ वर्षीय अजेन्द्र शाही बेपत्ता छन,” उनले बाह्रखरीसित भने ।

वर्षाका कारण प्रहरी टोली राति नै घटनास्थलमा पुग्न नसकेको उनले बताए । ‘‘वर्षाले टावर अवरुद्ध छन् । घटनास्थलनजिकैको याङ्चु प्रहरीचौकीमा सम्पर्क हुन सकेन । त्यसैले आज बिहानदेखि घटनास्थलमा पुगेका छौँ,” डीएसपी शर्माले भने ।

हुम्लाका प्रमुख जिल्ला अधिकारी गणेश आचार्यले जानकारी संकलन गर्न कठिनाइ भइरहेको बताए । ‘‘लिमी, लाप्चाका सीमानाकाहरू हिउँले पुरिएका छन् । कहाँ के भइरहेको छ भनेर जानकारी लिन सकिने अवस्था छैन । नेपाल टेलिकमको टावर अवरुद्ध भएको छ । वर्ल्डलिंकको इन्टरनेट सेवा पनि अवरुद्ध छ,” उनले भने ।