काठमाडौं । पाटन अस्पतालको कोभिड आईसीयू वार्ड इन्चार्ज शुशीला नेपालले यसपटक दसैँमा चार दिनको छुट्टी पाएकी छिन् । गत वर्ष आलोपालोमा थोरै बिदा पाएकी सुशिला यो वर्ष चार दिन बिदा पाएर मख्ख छिन् । 

१९ वर्षअघि नर्सिङ पेसामा प्रवेश गरेकी उनीसँग जागिरको सुरुवाती दिनहरूमा लगातार तीन वर्षसम्म दसैँ नपाएको अनुभव छ । “यो पेसामा छिर्दा नै दिनरात चाडपर्व नभनी काम गर्नुपर्छ भनेर मानसिक रूपमा तयार भइसकेकी थिएँ । सुरु सुरुका दिनहरूमा परिवारसँग दसैँ मनाउन नपाउँदा खल्लो लाग्थ्यो तर वर्षहरू बित्दैजाँदा बानी परिसक्यो,” उनले भनिन् ।

वार्डको इन्चार्ज भइसकेपछि उनलाई आफूभन्दा पनि अरूको व्यवस्थापन कसरी गर्ने भन्ने चिन्ता हुन्छ । परिवारसँगै रहन मन त उनलाई पनि छ । तर, आफैँ नेतृत्व तहमा भएपछि सबैलाई आलोपालो मिलाएर छुट्टी दिनुपर्छ भन्नेमा उनी सजग छिन् । 

उनकाअनुसार विगतका वर्षहरूमा स्वास्थ्यकर्मीहरू अस्पतालमै सँगै बसेर रमाइलो गर्थे । तर, कोभिडले गर्दा पोहोरदेखि उनीहरूको जमघट पातलिएको छ । 

“सिनियर जुनियर मिलाएर ड्युटी राख्ने गरेका छौँ । परिस्थिति सहज हुँदा अस्पतालमै पनि सँगै बसेर खाना खाएर रमाइलो गर्ने गरेका थियौँ । तर, पोहोरदेखि कोभिडको जोखिमले गर्दा भेटघाट कम गरेका छौँ,” उनले भनिन् ।

सबैजना दसैँको रमझममा हुँदा हामी बिरामीको सेवामा हुन्छौँ, यही सेवा नै हामीले गरेको धर्म हो भन्ने लाग्छ । समाजका लागि गरेको योगदान हो भन्ने लाग्छ,” उनले भनिन्, “यही सोचाइले दसैँमा बिदा नपाउनुमा खासै दुःख लाग्दैन । तर, कहिलेकाहीँ परिवारले नबुझिदिँदा नमिठो महसुस हुन्छ । हाम्रो पेसा नै यस्तै छ, सबैले बुझिदिए हुन्थ्यो भन्ने लाग्छ ।”

पाटन अस्पतालकै इन्टर्नल मेडिसिन युनिटमा कार्यरत डा. सदिना देवकोटाको भने यो वर्ष दसैँ छुट्टी छैन । टीकाको दिन बिहानदेखि भोलिको ४ बजेसम्म नियमित ड्युटीमा हुँदा उनलाई घर परिवारको याद बारम्बार आइरहन्छ । तर, ‘ड्युटी इज ब्युटी’ भनेर आफूलाई सम्हाल्छिन् उनी ।

“पहिले सिन्धुपाल्चोकको जिल्ला अस्पतालमा पोस्टिङ थियो । लगातार दुई वर्ष दसैँको टीका छुट्यो । अहिले काठमाडौंमै घर भएर पनि परिवारसँग बसेर टीका लगाउन नपाउँदा कताकता नरमाइलो त लाग्छ नै तर ड्युटी इज ब्युटी भनेर रमाउने प्रयासमा हुन्छु,” डा. सदिनाले भनिन् ।

शुक्रराज ट्रपिकल तथा सरुवा अस्पतालका निर्देशक डा. अनुप बास्तोला दसैँ बिदाका चार दिन नै ड्युटीमा रहनेछन् । “अहिले अस्पतालमा बिरामीको चाप निकै कम छ तर पनि आईसीयू, कोभिड युनिट हेर्नुपर्छ अस्पताल आइरहेकै हुन्छु,” डा. बस्तोला भन्छन्, “यसपटकको दसैँ परिवार र अस्पतालका साथीहरूसँग दुवैतिर मनाउनुपर्ला ।”