काठमाडौं । नेपाल राष्ट्र बैंकले ५० करोड रुपैयाँभन्दा माथिको कर्जा प्रवाह गर्दा  ‘त्रिपल ए’ रेटिङ आएमा भारित औसत जोखिम ५० प्रतिशत अर्थात् ५० प्रतिशत मात्रै क्यापिटल चार्ज लगाउँदा हुने व्यवस्था गरेको छ ।

राष्ट्र बैंक बैंक तथा वित्तीय संस्था नियमन विभागले एकीकृत निर्देशन–२०७७ मा संशोधन गर्दै ‘त्रिपल ए’ रेटिङ पाएको ऋणीलाई प्रवाह भएको कर्जाको जोखिम भार ८० प्रतिशतबाट ५० प्रतिशतमा झारेको छ ।

त्यस्तै, ‘डबल ए प्लस’देखि ‘डबल ए माइनस’सम्म रेटिङ  भएको कर्जाको जोखिम भार ८५ प्रतिशतबाट ७० प्रतिशत र ‘ए प्लस’देखि ‘ए माइनस’ रेटिङ भएको ऋणको हकमा जोखिम भार ९० बाट ८० प्रतिशत कायम गरिएको राष्ट्र बैंकका प्रवक्ता देवकुमार ढकालले बताए ।

यसले बैंकहरूलाई पुँजीकोषमा केही सहजता हुने र रेटिङमा पनि प्रोत्साहन हुने ढकाल बताउँछन् ।