काठमाडौं । एभरेष्ट प्रिमियर लिगको फाइनलमा आज पोखरा राइनोज र चितवन टाइगर्समध्ये जसले जिते पनि प्रतियोगिताले नयाँ विजेता पाउनेछ । चितवन र पोखरा दुबैले प्रतियोगितामा पहिलो पटक फाइनलमा स्थान बनाएका हुन् ।

प्रतियोगिताको पहिलो संस्करण पञ्चकन्या तेजले जितेको थियो । त्यतिबेला टिमको नाम व्यापारिक घरनाहरुको नामबाट राखिएको थियो । दोस्रो संस्करणबाट फ्रेन्चाइज टिमहरुको नाम परिवर्तन गरियो । त्यसपछि दोस्रोमा विराटनगर र तेस्रोमा ललितपुर प्याट्रियट्सले उपाधि उचाले । दुबैमा भैरहवा ग्लाडियटर्स उप विजेता बनेको थियो । भैरहवाको कप्तानी शरद भेषावकरले गरेका थिए ।

प्रतियोगितामा पहिलो पटक शरदले कप्तानी गरेको टिम नहुने भएको छ । पहिलो संस्करणमा शरदले कप्तानी गरेको पञ्चकन्या तेजले उपाधि जितेको थियो । दोस्रो र तेस्रोमा भैरहवा उपविजेता बनेको थियो । 

कीर्तिपुरस्थित त्रिवि क्रिकेट मैदानमा १२ः१५ बजे हुने खेलमा पोखरा र चितवन दुबैका कप्तानले ईपीएलमा पहिलोपटक फाइनल पुगे पनि त्यसको दबाब लिएर नखेल्ने बताएका छन् । 

‘‘यस प्रतियोगितामा पहिलो फाइनल हो । तर, हामीले यसअघि पनि अन्य प्रतियोगितामा धेरै फाइनल खेलिसकेका छौं,’’ पोखराका कप्तान विनोद भण्डारीले भने, ‘‘त्यसैले आज फाइनलको दबाब लिएर खेल्नुभन्दा पनि अर्को एउटा खेल मानेर खेल्नेछौं ।’’

पोखराले जारी संस्करणमा दुई पटक चितवनसँग प्रतिस्पर्धा गरिसकेको छ । लिग चरणमा पोखराले एक खेलमात्र हारेको थियो । त्यो चितवनविरुद्ध नै थियो । चितवनले शीर्ष र पोखराले दोस्रो स्थानमा रहेर क्वालिफायरमा स्थान बनाए । क्वालिफायर्समा पनि दुई टोलीले प्रतिस्पर्धा गरे । दुबै पटक चितवनले पोखरालाई ९ विकेट हराएको थियो ।

तर, चितवनका कप्तान सोमपाल कामीले विगतको नतिजाले फाइनलमा केही अर्थ नराख्ने बताउँछन् । 

‘‘विगतमा कस्तो नतिजा आयोभन्दा पनि भविष्यमा राम्रो गर्नका लागि खेल्ने हो । यो विल्कुलै नयाँ खेल हो । त्यो दिन जसले राम्रो क्रिकेट खेल्छ उसले उपाधि जित्ने हो । हामी राम्रो क्रिकेट खेल्ने प्रयास गर्नेछौं,’’ सोमपालले भने । 

पोखराले लिग चरणको खेलमा चितवनलाई सात विकेट गुमाएर १२३ रनको लक्ष्य दिएका थियो । जुन चितवनले १६.४ ओभरमा एक विकेट गुमाएर पूरा गरेको थियो । चितवनका मोहम्मद शाहजाद ६३ र भिम सार्की ५४ रनमा अविजित रहेका थिए । 

क्वालिफायर्समा पोखराले १५ ओभरमा सबै विकेट गुमाएर ६६ रनमात्र बनाउन सक्यो । ६७ रनको लक्ष्य चितवनले ७.५ ओभरमा एक विकेट गुमाएर पूरा गर्यो । यस खेलमा पनि शाहजादले ४८ रन बनाए । 

पोखराका कप्तान विनोद भण्डारीले ओपनरले राम्रो खेल्यो भने फाइनलमा राम्रो नतिजा ल्याउन सक्ने विश्वास व्यक्त गरेका छन् ।

‘‘दुबै खेलमा हामीले पहिले ब्याटिङ गर्यौं । राम्रो स्कोर खडा गर्न सकेनौं । ओपनिङमा केही समस्या देखिएको छ । रिचार्ड लेभीले राम्रो साथ पाइरहेका छैनन् । उनलाई नेपाली ब्याट्सम्यानले राम्रो साथ दियो भने राम्रो योगफल बनाउन सकिन्छ,’’ विनोदले भने, ‘‘विश्वास छ फाइनलमा त्यो समस्या समाधान हुनेछ ।’’

चितवनका कप्तान सोमपालले विगतको नतिजा दोहर्याउने विश्वास व्यक्त गरे । उनी भन्छन् ‘‘क्रिकेट बल र ब्याटको खेल हो । पाँच बलमा छक्का लाग्यो भने खेलको अवस्था परिवर्तन हुन्छ । र पाँच बलमा पाँच विकेट गयो भने पनि खेलको अवस्था परिवर्तन हुन्छ । त्यसैले खेलमा के हुन्छ भन्न सकिँदैन । तर, हामीले प्रतियोगितामा धेरै मिहिनेत गरेका छौं । राम्रो नतिजा निकालेका छौं । त्यसलाई फाइनलमा पनि निरन्तरता दिनेछौं ।’’