काठमाडौं । नेपाली कांग्रेसको पूर्व निर्धारित १४ औं महाधिवेशन कार्यतालिका पुनः प्रभावित भएको छ । आज (असोज ९) मा ६४ जिल्लाको एकसाथ पालिका तहको अधिवेशन गर्न कांग्रेस असफल भएको छ । केन्द्रीय निर्वाचन समिति संयोजक महादेव यादवका अनुसार ६४ जिल्लामा एकसाथ पालिका तहको अधिवेशन हुन नसकेको हो ।

संयोजक यादवका अनुसार कति जिल्लाको पालिका तहको अधिवेशन हुन नसकेको भन्ने यकिन तथ्यांक भने आइसकेको छैन । “हाम्रो तालिका र तयारी अनुसार आज ६४ जिल्लाको पालिका अधिवेशन सक्ने भनिएको थियो, तर त्यो सम्भव भएन,” यादवले बाह्रखरीसँग भने । 

यादवका अनुसार जिल्ला तहसँग रिर्पोट लिने काम भइरहेको छ । बाँकी रहेको जिल्लामा अधिवेशन गराउने अधिकार भने जिल्ला निर्वाचन अधिकृतसँग छ । “अर्को मिति तोकेर अधिवेशन गराउने जिम्मा उहाँहरुलाई छ, यो निर्वाचन निर्देशिकाको व्यवस्था हो,” यादवले भने ।
 
शुक्रबार विहान बसेको पार्टीको पदाधीकारी र पूर्व पदाधीकारीहरुको बैठकले ६४ जिल्लाको अधिवेशन गर्ने निर्णय गरेको थियो । तर, काठमाडौं जिल्लामा भने १६ गते पालिका तहको अधिवेशन गर्ने निर्णय भएको छ । सिन्धुपाल्चोक जिल्लामा भने जिल्ला निर्वाचन अधिकृतले  विज्ञप्ति जारी गरेर अर्को सूचना प्रकाशित नभएसम्म अधिवेशन रोकेको जानकारी गराएका छन् । यस्तै काभ्रेमा पनि अधिवेशन रोकिएको छ । सभापति मधु आचार्यका अनुसार निर्वाचन अधिकृत सम्पर्कमा नआएकाले अधिवेशन स्थगन गरिएको हो । सामाजिक सञ्जालमार्फत जानकारी दिँदै आचार्यले निर्वाचन अधिकृत राजेन्द्र लामिछाने विना सूचना सम्पर्कविहीन भएकाले अधिवेशन स्थगन गर्नुपरेको उल्लेख गरेका छन् ।
 
शुक्रबारको कांग्रेस पदाधिकारी र पूर्वपदाधिकारीको शुक्रबारको बैठकपछि सहमहामन्त्री डा. प्रकाशशरण महतले महाधिवेशन सार्नुपर्ने अवस्था आए धेरै टाढा नधकेलिने बताए ।  “समयले नभ्याउने भयो भने जतिदिन भ्याउँदैन, त्यति दिन सार्न सकिन्छ । तर, त्यसलाई महाधिवेशन सर्ने भन्न मिल्दैन,” सहमहामन्त्री महतले बैठकपछि भने, “पालिका अधिवेशन दसैँ अगाडि सकाउने निर्णय भएको छ । प्रदेशसभा निर्वाचन क्षेत्र, प्रतिनिधिसभा निर्वाचन क्षेत्र र जिल्ला अधिवेशन दसैँ पछाडि हुन्छ ।”

बैठकले हिमाली जिल्लाको हकमा भने दसैँअघि नै जिल्ला अधिवेशन टुंग्याउने सहमति गरेको छ । तर, अन्य जिल्लाको हकमा भने अन्योल कायमै छ । बैठकपछि औपचारिक प्रतिक्रिया दिँदै पार्टी प्रवक्ता विश्वप्रकाश शर्माले महाधिवेशन तालिका अनुसार दाबी गरे । “पालिका अधिवेशन पूर्वनिधारित समयमै हुनेछ भनेर हामीले देशभरका साथीहरूलाई विश्वस्त गरिसकेका छौँ,” शर्माले भने, “पालिका अधिवेशन पूर्वनिर्धारित कार्यतालिका अनुरूप नै हुन्छ । ९ गते भनिए पनि कहीँ १० गते होला, कहीँ ११ र १२ गतेसम्म जिल्लामा रहनुभएका निर्वाचन प्रतिनिधिले पार्र्टीसँग समन्वय गरेर केन्द्रीय निर्वाचन समितिको सहमतिमा मिति तोक्न सक्नुहुनेछ ।”

प्रवक्ता शर्माले थपे, “प्रदेश निर्वाचन क्षेत्र, प्रतिनिधिसभा निर्वाचन क्षेत्र वा जिल्लामा कहीँ न कहीँबाट एकसाथ लिएर जानेछौँ ।”