जनकपुरधाम । लोकतान्त्रिक समाजवादी पार्टी (लोसपा) नेपालले संविधान दिवसलाई कालो दिवसका रूपमा बनाएको छ । आइतबार जनकपुरधाममा पार्टीका नेता तथा कार्यकर्ताले संविधानले जनताको माग पूरा नगरेको भन्दै विरोध प्रदर्शन गरेर संविधान जारी भएको दिनलाई कालो दिवसका रूपमा मनाएका हुन् ।

जनक चोकबाट सुरु भएको विरोध प्रदर्शन राम चोक, महाबिर चोक, सोनारपट्टी र जानकी मन्दिर हुँदै कोणसभामा परिणत भएको थियो । प्रदर्शनमा सहभागिहरूले ‘असोज ३ कालो दिन, हाम्रो माग पूरा गर, अधुरो संविधान मान्दैनौँ र मधेसी एकता जिन्दावाद’ जस्ता नारा लगाएका थिए । 

पार्टीले आज साँझ ६ बजे ‘ब्ल्याक आउट’ गर्ने कार्यक्रमसमेत गर्ने जनाएको छ । 

यस्तै, जनता समाजवादी पार्टी (जसपा) नेपालले संविधानमा सुधार गर्न भन्दै अन्तरक्रिया कार्यक्रम गरेको थियो । जनकपुरधामस्थित उद्योग वाणिज्य संघमा आयोजित अन्तरक्रिया कार्यक्रममा सहभागी नेता, कार्यकर्ताले संविधानले मधेसको माग पूरा नगरेको भन्दै संघर्ष जारी राख्ने धारणा राखेका थिए ।