काठमाडौं । २ नम्बर प्रदेशका १६ सांसद लोकतान्त्रिक समाजवादी पार्टी (लोसपा) मा खुलेका छन् । जनता समाजवादी पार्टीबाट विभाजन भएर बनेको दल लोसपामा प्रदेश २ का पूर्वमन्त्री जितेन्द्र सोनलसहित १६ जना सांसद खुलेका हुन् ।

लोसपा केन्द्रीय कार्यकारिणी सदस्य केशव झाकाअनुसार १६ जनामा सांसदहरूमा उपेन्द्र महतो, परमेश्वर शाह, जयनुल रायन, रानी शर्मा लगायत रहेका छन् ।

निर्वाचन आयोगले मंगबार बेलुकी ५ बजेसम्मका लागि प्रदेश र स्थानीय तहका जनप्रतिनिधिहरूलाई दल रोज्ने समय दिएको थियो । 

लोसपा केन्द्रीय कार्यकारिणी सदस्य झाकाअनुसार सुदूपश्चिम प्रदेशमा १ जना सांसद लोसपामा लागेका छन् । सांसद कृष्णबहादुर चौधरीले लोसपमा सनाखत गरेका हुन् । 

लुम्बिनी प्रदेशबाट तीन जना सांसदहरू लोसपामा लागेका छन् । जसपाले कारबाही गरेका सांसदहरू सन्तोष पाण्डे, विजय बहादुर यादव र कल्पना पाण्डे लोसपामा खुलेका हुन् । 

“सर्वोच्चमा सांसद पद पुनर्वहालीका लागि मुद्दा छ । सर्वोच्चले पुनर्वहाली गर्‍यो भने उहाँहरू हाम्रो पार्टीमा आउनुहुन्छ,” झा ले भने, “निर्वाचन आयोगले पनि सांसद पद पुनर्वहाली भयो भने तत्काल लोसपामा खुल्नेगरी सनाखत गराएको छ ।”

स्थानीय तहतर्फ सप्तरीका ९६ जना जनप्रतिनिधि लोसपामा खुलेका छन् । यस्तै, सिरहाका १२, धनुषाका १०९ र महोत्तरीका २५८ जनप्रतिनिधले निर्वाचन आयोग पुगेर लोसपामा सनाखत गरेका छन् । यसैगरी, सर्लाहीका १३७, रौतहटका ८, बाराका १०३ जनप्रतिनिधिले पनि लोसपाको पक्षमा सनाखत गरेका छन् । यस्तै, पर्साका २, रूपन्देहीका २० र कपिलवस्तुका १ जना जनप्रतिनिधिले लोसपा रोजेका छन् । 

“रौतहट गौर नगरपालिका मेयर अजय गुप्ता, जलेश्वर नगरपालिका मेयर शंकर शाही लगायतका प्रभावशाली नेताहरू लोपामा सनाखत गर्नुभएको छ,” झाले भने । 

लोसपाको पक्षमा रेशम चौधरीसहित १५ जना सांसदहरूले निर्वाचन आयोगमा पुगेर यसअघि नै सनाखत गरिसकेका छन् । यस्तै, जसपा बन्दाका ५१ केन्द्रीय कार्यकारिणी सदस्यमध्ये १७ जनाले लोसपामा रहेको निर्वाचन आयोगलाइ सनाखतसहित जानकारी दिएका छन् ।