![इटालीको नयाँ कीर्तिमान](https://12khari.top/uploads/posts/ITALY1630895239.jpg)
काठमाडौं । इटालीले ३६ खेलसम्म अपराजित रहँदै नयाँ कीर्तिमान बनाएको छ । इटालीले ३६ खेलसम्म अपराजित रहने टिमको कीर्तिमान बनाएको हो । फिफा विश्वकप छनोट अन्तर्गत युरोपियन छनोटमा स्विट्जरल्यान्डसँग गोलरहित बराबरी खेल्दै इटालीले कीर्तिमान बनाएको हो ।
आइतबार राति भएको खेलमा इटालीले स्विट्जरल्यान्डसँग गोलरहित बराबरी खेलेको थियो । बसेलमा भएको खेलमा इटालीले आफूले पाएको मौका सदुपयोग गर्न सकेन ।
इटालीले सन् २०१८ सेप्टेम्बरमा यूइएफए नेसन्स लिगको समूह चरणमा पोर्चुगलसँग १–० पराजित भएको थियो । त्यसयता इटाली कुनै खेलमा पराजित भएको छैन । इटालीले युरोकप फुटबलमा पनि अपराजित हुँदै उपाधि जितेको थियो ।
यो बराबरीसँगै इटालीले ५ खेलमा ११ अंक जोडेको छ । समूह ‘सी’मा रहेको इटाली अंक तालिकाको शीर्ष स्थानमा छ । स्विट्जरल्यान्ड ७ अंक जोडेर दोस्रो स्थानमा छ । तेस्रो स्थानमा बुल्गेरिया छ ।
![Global Ime bank](https://baahrakhari.com/uploads/bigyaapan/30885600.gif)