काठमाडौं । नेपालले भारतविरुद्धको पहिलो मैत्रीपूर्ण खेल १–१ को बराबरी खेलेको छ । नेपालले पहिलो हाफमा अग्रता लिएपनि त्यसलाई जोगाउन नसक्दा नेपालले बराबरीमा चित्त बुझाउनु परेको हो । 

नेपालले ३६औँ मिनेटमा अञ्जन विष्टको गोलबाट अग्रता लिएको थियो । अञ्जनले भारतका रक्षकले गरेको गल्तीमा गोल हानेका हुन् । 

भारतका रक्षक चिङलेनसाना सिंहले गोलकिपर गुरप्रित सिंहलाई ब्याकपास दिएका थिए । तर गुरप्रितले राम्रोसँग नियन्त्रणमा लिन नपाउँदै अञ्जनले खोसेर खाली पोष्टमा गोल हानेका थिए । अन्तर्राष्ट्रिय फुटबलमा अञ्जनको यो पाँचौँ गोल हो । यसअघि उनले चाइनिज ताइपेई र कुवेतविरुद्ध गोल गरेका थिए ।

भारतका वैकल्पिक खेलाडी अनिरुद्ध थापाले ६०औँ मिनेटमा बराबरी गोल फर्काएका थिए । भारका कप्तान सुनिल क्षेत्रीले १८ यार्डबाट हानेको प्रहार गोलकिपर किरण चेमजोङले बचाएका थिए । तर राम्रो नियन्त्रणमा लिन नसक्दा भारतका वैकल्पिक खेलाडी अनिरुद्धले गोल गरेका हुन् । अनिरुद्ध दोस्रो हाफको सुरुमै मैदान छिरेका थिए । 

दोस्रो हाफको सुरुमै भारतले दुई खेलाडी परिवर्तन गरेको थियो । ब्रान्डन फर्नान्डेजको स्थानमा अनिरुद्ध थापा र ग्लान मार्टिन्सको स्थानमा रहिम अली मैदान छिरेका थिए । रहिमको यो डेब्यू खेल हो । त्यसपछि भारतले नेपालमाथि दबाब बढाएको थियो । 

५३औँ मिनेटमा मनबीर सिंहको क्रसमा भारतका कप्तान सुनिल क्षेत्रीले ६ यार्डबक्सबाट हानेको हेडिङ प्रहार थोरैले बाहिरिएको थियो ।

५०औँ मिनेटमा किरण चेमजोङ डी एरियाबाहिर गएर बल समातेपछि रेफ्री प्रकाशनाथ श्रेष्ठले पहेँलो कार्डको दर्शन देखाएका थिए । भारतीय खेलाडीले किरणलाई रातो कार्डको देखाउनका लागि अपिल गरेपनि प्रकाशनाथले अस्वीकार गरे ।