काठमाडौं । चीनले १८ वर्षभन्दा मुनिका बालबालिकाले अनलाइन गेम खेल्न पाउने समय कटौती गरेको छ ।

त्यहाँको भिडियो गेम नियामकले बालबालिकाले शुक्रबार, सप्ताहन्त र बिदाहरूमा एक घण्टा मात्र अनलाइन गेम खेल्न पाउने जनाएको छ । यसअघि पनि दिनको जम्मा ९० मिनेट मात्र र बिदाको समयमा तीन घण्टासम्म अनलाइन गेम खेल्न अनुमति दिइएको थियो ।

चिनियाँ सञ्चारमाध्यमका अनुसार बालकालिकाहरूले रातिको ८ देखि ९ बजेसम्म मात्र अनलाइन गेम खेल्न सक्नेछन् । निर्धारित समयभन्दा बाहेकका समयमा बालबालिकालाई अनलाइन गेम खेल्नबाट रोक्न गेमिङ कम्पनीहरूलाई निर्देशन दिइएको छ ।

यो महिनाको सुरुतिर एउटा सरकारी सञ्चारमाध्यमले अनलाइन गेमहरूलाई ‘स्पिरिचुअल अफिम’ भनी आक्षेप लगाएको थियो । यो नियम कार्यान्वयन भए/नभएको जाँच गर्न अनलाइन गेमिङ कम्पनीहरूको निरीक्षण गर्ने नियामकले जनाएको छ ।

एक महिनाअघि चीनको राज्य सञ्चालित एक पत्रिकाले धेरै किशोरहरू अनलाइन गेमको लतमा फसेको र यसले उनीहरूमा नकारात्मक असर पारेको उल्लेख गरेको थियो । सो लेखले चीनका ठूला अनलाइन गेम फर्महरूको मूल्यमा उल्लेख्य कमी आएको थियो ।

गएको जुलाईमा चिनियाँ गेमिङ कम्पनी टेन्सेन्टले बालबालिकालाई रातिको १० देखि बिहान ८ बजेको बीचमा अनलाइन गेम खेल्न रोक्न पहिचान गर्न फेसियल रिकग्निसन सुरु गर्ने घोषणा गरेको थियो । चीनको अलिबाबा, डीडी, टेन्सेन्टलगायत प्रविधिका विशाल कम्पनीहरू ओरालो लागिरहेका बेला यो कदम चालिएको हो ।

बालबालिकाले वयस्क आईडी बनाएर यो नियमलाई छल्न सक्ने आशंकाका बीच यो कदम चालिएको छ । यसबाट अनलाइन खेल खेल्ने दशौँ लाख बालबालिकाहरू असन्तुष्ट हुन सक्नेछन् ।

चिनियाँ अधिकारीहरू बालबालिकामा भएको गेमिङ एडिक्सन (खेलको लत)का बारेमा लामो समयदेखि चिन्तित छन् । चिनियाँ सरकारले यो नियमले युवामा ‘सकारात्मक ऊर्जा’ सिर्जना गर्ने र उनीहरूलाई बेइजिङको ‘सही मूल्यहरू’को बारेमा शिक्षित गर्ने आशा राखेको छ ।

धेरै चिनियाँ अभिभावकले यस प्रतिबन्धको प्रशंसा गर्न सक्नेछन् । जबकि, सामाजिक सञ्जालमा सरकारको यो कदमलाई ‘अव्यावहारिक’ र ‘स्वेच्छाचारी’ भन्दै आलोचना गरिएको छ ।

“म कहिले ट्वाइलेट जाने, खाना खाने र सुत्ने भनी किन योजना बनाउँदैनौ ?,” एकजनाले व्यंग्यात्मक टिप्पणी गरेका छन् ।