काठमाडौं । अमेरिकी राष्ट्रपति जो बाइडेनले आलोचनाको बाबजुद यही अगस्ट ३१ तारिखमै अमेरिकी सेना अफगानिस्तानबाट फिर्ता हुने निर्णयमा अडिग रहेको घोषणा गरेका छन् । यो निर्णयले उद्धार कार्य थप लम्ब्याउनुपर्ने साझेदार मुलुकहरूको मागलाई अस्वीकार गरेको छ ।

जी–७ मुलुकका नेताहरूले उद्धारको समयसीमा लम्ब्याउन आह्वान गरेका थिए । तर, राष्ट्रपति बाइडेनले उडानहरूको संख्यामा वृद्धि भएको भन्दै समयसीमाभित्रै उद्धार कार्य सम्पन्न हुने आफ्नो विश्वास दोहोर्‍याएको बीबीसीले जनाएको छ ।

“जति छिटो सम्पन्न हुन्छ त्यति राम्रो,” उनले भने । समयसीमा लम्ब्याउँदा अमेरिकी फौज र नागरिकहरूलाई जोखिम हुन सक्ने उनको भनाइ छ ।

आईएसआईएस–केले अमेरिकी फौज, गठबन्धन बल र निर्दोष नागरिकहरूलाई आक्रमणको लक्ष्य बनाउन खोजिरहेका उनले बताए । अमेरिकी सञ्चारमाध्यमका अनुसार केही सैनिक फर्किइसकेका छन् । यद्यपि, उद्धार कार्य भने प्रभावित भएको छैन ।

अगस्ट १५ मा तालिबानको कब्जामा परेको काबुलबाट कम्तीमा ७० हजार मानिसलाई उद्धार गरिएको छ । तालिबान लडाकुहरूले उद्धार कार्यको समयसीमा थप्न नसकिने बताउँदै आएका छन् ।