काठमाडौं । पार्टी विभाजन हुँदा तेस्रो धारमा उभिएका नेकपा एमाले नेताहरु र अध्यक्ष केपी शर्मा ओलीबीच निर्णायक वार्ता भएपछि स्थायी कमिटी बैठक बोलाइएको छ ।

आज मंगलबारका लागि बैठक बोलाइएको छ ।

नेताहरु अष्टलक्ष्मी शाक्य, भीम रावल, घनश्याम भुसाल, योगेश भट्टराई, भीम आचार्य, सुरेन्द्र पाण्डे, रघुजी पन्तलगायतका नेताहरु ओली निवास बालकोट पुगेका हुन् । 

पार्टी विभाजनमा माधव नेपाललाई साथ नदिएका नेताहरु एमालेमा जानका लागि पनि १० बुँदे सहमति कार्यान्वयन हुनुपर्ने माग राख्दै आएका थिए ।

महाराजगञ्जको त्यो बैठक 

एक नेताका अनुसार सोमबारको बैठकमा ओलीलाई यसअघि महाराजगन्जमा भएको छलफलले दबाब पनि दियो ।

माधव नेपाल पक्षसँग पार्टी एकताको च्याप्टर क्लोज भएको बताएका ओली तेस्रो धारका नेताहरुसँग वार्ताको लागि राजी भए । 

गएको शुक्रबार पार्टी विभाजनमा साथ नदिएका अर्थात् एमालेमा माधव समूहमा रहेका ५७ जना केन्द्रीय सदस्यहरु भेला भएर महाराजगञ्जमा छलफल गरे । 

माधव नेपाललाई साथ नदिएका नेताहरु आफ्नो पक्षमा आउने अनुमानमा रहेका ओली सो दिनको बैठकको वक्तव्यले झस्काएको एक नेता बताउँछन् । 

५७ जनामा वाग्मती प्रदेशकी मुख्यमन्त्री अष्टलक्ष्मी शाक्य पनि छन् । उनलाई ओलीले मुख्यमन्त्री डोरमणि पौडेललाई राजीनामा गराएर मुख्यमन्त्री बनाएका थिए । तर, मुख्यमन्त्री शाक्यको हस्ताक्षरसहितको वक्तव्य जारी हुँदा ओली झस्किएको उनको भनाइ छ । 

“पार्टी विभाजन भएपछि ओलीले तेस्रो धारका विषयमा खासै चासो दिएनन् । जब शुक्रबार हामीले ५७ जनाको उपस्थितको बैठकबाट वक्तव्य जारी गर्‍यौँ । के साँच्चै ओली १० बुँदे मान्न तयार छैनन् त भन्ने बहस पनि सुरु भयो । त्यसबाट ओली झस्किए । र वार्ता गर्न तयार भए,” ती नेता बताउँछन् । 

तेसो धारमा रहेका नेताहरुले १० बुँदेको कार्यान्वयनसँगै माधव नेपालसहितका १४ जना सांसदलाई गरिएको कारबाही फिर्ता लिनुपर्ने माग राख्दै आएका छन् । 

त्यस्तै नेपालले नयाँ पार्टी दर्ताको प्रक्रिया रोकिनुपर्ने उनीहरुको माग छ । सुरुवातमा ओली पक्षका दोस्रो तहका नेताहरुसँग वार्ता गरेका तेस्रो धारका नेताहरुले आइतबारको गृहकार्यपछि ओलीसँग वार्तामा बसेका हुन् ।