काठमाडौं । एनआईसी एशिया बैंकले गत आ.व. २०७७/७८ मा व्यवसायमा ऐतिहासिक वृद्धि गरेको छ । गत आर्थिक वर्षको चौथो त्रैमासिक वित्तीय विवरणमा बैंकले अघिकांश सूचकमा प्रतिस्पर्धी बैंकलाई पछाडि छोडेको छ ।

बैंकले गत आवमा कर्जा लगानी ९१ अर्बको बढाएर २६५ अर्ब पुर्‍याउँदा निक्षेप ९० अर्बले वृद्धि गरी कुल स्वदेशी मुद्राको निक्षेप संकलन २९८ अर्ब पुर्‍याएको छ । गत आर्थिक वर्षमा २७ वाणिज्य बैंकहरूले कुल ७१९ अर्ब कर्जा विस्तार गरेकोमा कुल कर्जा विस्तारमा बैंकको हिस्सा सबैभन्दा धेरै १२.६६ प्रतिशत र निक्षेपतर्फ लगानीतर्फ  ६५५ अर्ब वृद्धि भएकोमा बैंकको हिस्सा १३.५५ प्रतिशत रहेको छ ।

उक्त व्यवसायबाट बैंकले गत आर्थिक वर्षमा ३ अर्ब २५ करोड खुद मुनाफा आर्जन गरेको छ । यस आधारमा बैंकको वार्षिक प्रतिसेयर आम्दानी २८ रुपैयाँ ११ पैसा रहेको छ ।  उक्त मुनाफको आधारमा बैंकको स्व–पुँजीमा प्रतिफल (आरओई) १७.१४ प्रतिशत रहेको छ, जुन वाणिज्य बैंकहरूमध्ये सबैभन्दा बढी भएको बैंकले जनाएको छ । अघिल्लो आर्थिक वर्षमा बैंकको आरओई सबैभनदा धेरै रहेको थियो ।

बैंकले आफ्नो रणनीतिअनुसार कर्जा पोर्टफोलियोमा न्यून जोखिम कायम गर्ने साना तथा मझौला कर्जा र रिटेल कर्जामा लगानी विस्तार गर्ने नीति अंगिकार गरेको र कोभिडको अवस्थामा उक्त रणनीति सफल भएको देखिन्छ । जसको प्रभावस्वरुप  कोभिड–१९ को विषम परिस्थितिमा पनि कर्जा असुलीतर्फ उत्साहजनक रहेको बैंकको दाबी छ । आर्थिक वर्ष २०७६/०७७ को अन्त्यमा ०.७५ प्रतिशत रहेको बैंकको  निस्क्रिय कर्जा गत आर्थिक वर्षको अन्त्यमा आउँदा ०.४६ प्रतिशतमा झरेको छ ।

गत आर्थिक वर्षसम्ममा बैंकले कुल कर्जा लगानीमा साना तथा मझौला र रिटेल प्रकारका कर्जा ८६ प्रतिशत रहेको बैंकले जनाएको छ । बैंकका प्रमुख १० ग्राहकको कुल कर्जा अंश बैंकको कुल कर्जाको ३.७ प्रतिशत मात्रै रहेको बैंकको दाबी छ ।

कुल कर्जामा ५ करोडभन्दा कम सीमा भएका कर्जाहरूको अंश ९०.५६ प्रतिशत रहेको बैंकले जनाएको छ । बैंकले निक्षेपतर्फ पनि स–साना निक्षेप एवम् व्यक्तिगत निक्षेप वृद्धि गर्दै जाने रणनीति लिएको जनाएको छ । बैंकले आ.व. २०७७/७८ मा ४ लाख ६६ हजार ४९५ नयाँ ग्राहक संख्या थप गर्दै २७ लाख ३६ हजारभन्दा बढी निक्षेप खाता पुर्‍याएको छ ।

देशको कुल जनसंख्यामध्ये २० देखि ५० वर्ष उमेर समूहसम्मको आर्थिक रूपमा सक्रिय जनसंख्याको करिब २५ प्रतिशत जनतालाई बैंकले  सेवा दिएको दाबी गरेको छ ।