काठमाडौं । सप्तरीमा हिजो भएको सवारी दुर्घटनामा दुईजनाको मृत्यु भएको छ । दुईजना गम्भीर घाइते छन् ।
खडक नगरपालिका–४, अमहामा सोमबार बेलुका करिब ७ बजे बसलाई ओभरटेक गर्ने क्रममा स११प ४०३८ नम्बरको मोटरसाइकल अनियन्त्रित भई विपरीत दिशाबाट आउँदै गरेको प्रदेश २ ०१ ००१ प ९५५६ नम्बरको मोटरसाइकलसँग ठोक्किन पुगेको थियो ।
दुर्घटनामा ४०३८ नम्बरको मोटरसाइकलका चालक सप्तरीकै शम्भुनाथ नगरपालिका–७ का २८ वर्षीय बुद्धसागर चौधरीको घटनास्थलमै मृत्यु भएको थियो । यस्तै, ९५५६ नम्बरको मोटरसाइकलका चालक सिरहाको लहान नगरपालिका–१७ का २८ वर्षीय रामशंकर यादवको भने उपचारको क्रममा सप्तऋषि अस्पतालमा मृत्यु भएको हो ।
घाइते भएका दुवै मोटरसाइकलमा पछाडि सवार दुईजनाको सोही अस्पतालमा उपचार भइरहेको छ । उनीहरूको अवस्था गम्भीर रहेको इलाका प्रहरी कार्यालय कडरवोनाले जनाएको छ ।
दुर्घटनामा परेका ती सवारीसाधनसहित बस चालकलाई सप्तरी प्रहरीले नियन्त्रणमा लिएको जनाइएको छ ।
