काठमाडौं । सुनसरीमा एक युवकलाई अपहरण गरी कुटपिटसमेत गरेको आरोपमा तीनजना पक्राउ परेका छन् ।

इटहरी उपमहानगरपालिका–४ बस्ने २२ वर्षीय एक युवकलाई अपहरण गरी बन्धक बनाई कुटपिटसमेत गरेको आरोपमा प्रहरीले शुक्रबार उनीहरुलाई पक्राउ गरेको हो ।

पक्राउ पर्नेहरूमा इटहरी उपमहानगरपालिका–७ बस्ने २५ वर्षीय संगीत थापा, १९ वर्षीय अनिष कार्की र इटहरी उपमहानगरपालिका–८ बस्ने २३ वर्षीय सिद्धार्थ राई छन् । इटहरी–८, फूलबारी टोलको प्लटिङमा उनीहरुले ती युवकलाई कुटपिट गर्दै गरेको अवस्थामा फेला पारी प्रहरीले पीडितको उद्धार गरेको जनाइएको छ ।

प्रहरीका अनुसार उनीहरुले युवकलाई बिहीबार दिउँसो इटहरी उपमहानगरपालिका–९, भोजपुरे टोलबाट जबर्जस्ती लिएर गएको खुल्न आएको छ । एउटा सिटी सफारीमा राखी आँखामा पट्टी बाँधेर संगीतको घरमा लगेका थिए । रातभर युवकलाई कोठाभित्र थुनेर राखे । शुक्रबार बिहान तीनैजनाले उक्त प्लटिङमा लगी कुटपिट गरेको प्रहरी अनुसन्धानका क्रममा खुल्न आएको जनाइएको छ ।

पक्राउ परेकाहरुविरुद्ध अपहरण तथा शरीर बन्धकसम्बन्धी कसुर मुद्दामा सुनसरी जिल्ला अदालतबाट सात दिन म्याद थप अनुमति लिई थप अनुसन्धान भइरहेको जिल्ला प्रहरी कार्यालय सुनसरीले जनाएको छ ।