![नारायणगढ–बुटवलखण्ड पूर्ण रूपमा सञ्चालनमा](https://12khari.top/uploads/posts/sadak kawasoti1625937626.jpg)
नवलपुर । बाढीका कारण कावासोतीमा सडक भासिएर अवरुद्ध भएको पूर्वपश्चिम राजमार्गको नारायणगढ–बुटवलखण्ड पूर्ण रूपमा सञ्चालनमा आएको छ ।
नवलपरासी (बर्दघाट–सुस्तापूर्व)को कावासोतीमा तीन दिनअघि सडक भासिएपछि डाइभर्सन गरेर साना सवारीसाधनलाई मात्रै आवतजावत गराइँदै आएकामा सडक मर्मत गरेर आज देखि पूर्ण रूपमा सञ्चालनमा ल्याइएको हो ।
कावासोतीमा भासिएको सडक मर्मत गरी आज दिउँसोबाट पूर्वपश्चिम राजमार्ग दुईतर्फी नै सञ्चालनमा ल्याइएको जिल्ला प्रहरी कार्यालयले जनाएको छ । जिल्लाका प्रहरी प्रवक्ता प्रहरी नायब उपरीक्षक दिलीपकुमार गिरीले डिभिजन सडक कार्यालय तथा नारायणगढ–बुटवल सडक विस्तार आयोजनाको सक्रियतामा भासिएको स्थानमा मर्मतपछि राजमार्ग पूर्ण रूपमा सञ्चालनमा ल्याइएको जानकारी दिए ।
बिहीबार आएको बाढीले कावासोतीमा ह्युमपाइप बगाएर सडक भासिएपछि निर्माण गरिएको डाइभर्सनबाट साना सवारीसाधन एकतर्फी मात्रै सञ्चालनमा ल्याइएको थियो ।
![Global Ime bank](https://baahrakhari.com/uploads/bigyaapan/30885600.gif)
बिहीबार बिहान ८ बजेट अवरुद्ध भएको सडक डाइभर्सनपछि शुक्रबार साँझदेखि एकतर्फी सञ्चालन हुँदै आएको थियो । आज दिउँसो मर्मतपछि सडक पूर्ण रूपमा दुईतर्फी नै सञ्चालनमा आएको भन्दै गिरीले सडकमा लामबद्ध ठूला सवारीसाधनको लाइनसमेत घटेको बताए । रासस