काठमाडौं । सत्तारूढ नेपाल कम्युनिस्ट पार्टी (एमाले) विभाजनको खतरामुक्त हुन सकेको छैन । प्रधानमन्त्री केपी शर्मा ओलीले दसौँ महाधिवेशन आयोजक कमिटी भङ्ग गरेर केन्द्रीय कमिटी बैठक बोलाए पनि वरिष्ठ नेता झलनाथ खनाल र माधवकुमार नेपाल समूह बैठकमा उपस्थित भएन । विभाजनको सम्भावनालाई कायमै राख्यो ।

त्यसो त, ओली पक्षले आयोजक कमिटीबाट केन्द्रीय कमिटीमा फर्कंदै गर्दा यसअघि गरिएको कारबाही र स्पष्टीकरणसमेत निष्क्रिय तुल्याएको थियो । र, फर्कने वातावरण बनाउन कोसिस गरेको थियो ।

तर, पार्टी अध्यक्ष ओलीले एकताअघि अर्थात् जेठ २ अगाडिको कमिटीको नभइ चैत्र ७ पछिको बैठकको निरन्तरता दिएको भन्दै  नेपाल समूह बैठकमा उपस्थित भएन ।

त्यसो त शुक्रबार बसेको केन्द्रीय कमिटीको १३ औँ बैठकले विपक्षी दलका नेता शेरबहादुर देउवालाई प्रधानमन्त्री बनाउन गरेको हस्ताक्षर फिर्ता लिन सोमबार साँझ ५ बजेसम्मको समयसीमा तोकेको छ ।

यसबीचमा दोस्रो तहका नेताहरूले एकता निम्ति भरमग्दुर प्रयत्न गरिरहेका छन् । शुक्रबार बिहानै सुरेन्द्र पाण्डे, गोकर्ण विष्ट र भीम आचार्य बालुवाटार पुगेर केन्द्रीय कमिटी बैठक रोक्न आग्रह गरेका थिए । तर, ओलीले रोक्न नसकिने बताए पनि उनीहरू थकित देखिएका छैनन् । एकता प्रयासलाई निरन्तरता दिइ नै राखेका छन् ।

दोस्रो तहका नेता सुवास नेम्वाङ, विष्णु पौडेल, सुुरेन्द्र पाण्डे, गोकर्ण विष्ट, भीम आचार्यलगायत नेताहरू शनिबार पनि समिट होटलमा बार्तामा बसेका थिए । तर, नेता नेपाल पूर्ववत् अडानबाट पछि नहटेपछि उनीहरूको केही सीप नचलेको एमाले नेताहरू बताउँछन् ।

ओली–नेपालबीच दुईपटक टेलिफोन वार्ता, उपलब्धी शून्य 

लामो समयदेखिको संवादहीनता चिर्दै बैठकको पूर्वसन्ध्या (बिहीबार बेलुका)मा प्रधानमन्त्री ओली र नेता नेपालबीच टेलिफोन वार्ता भएको थियो । त्यो वार्ताले निकास दिनुको सट्टा झन् तिक्तता बढाएको स्वयम् पार्टी अध्यक्ष ओलीले बताएका छन् । शुक्रबारको बैठकमा नेपालसँगको टेलिफोन–वार्ताबारे उनले ब्रिफिङ गरेका थिए । आफूले एक्लाएक्लै भेट–संवाद गर्न तयार रहेको बताउँदै लचिलो बने पनि नेता नेपालले कुरै गर्न मन छैन, साथीहरूले दिमाग चाटेको भएर फोनचाहिँ उठाएको भन्दै जवाफ फर्काएको ओलीको गुनासो थियो ।

स्रोतका अनुसार नेता नेपाललाई मनाउन दोस्रो तहका नेताहरूको वार्ता चलिरहँदा शनिबार बिहान घनश्याम भुसालचाहिँ कोटेश्वर, नेपाल निवास पुगेका थिए । 

नेपाललाई मनाउने घनश्यामको प्रयास सफल हुन नसकेको र नेता नेपाल आफ्नो अडानमा कायम रहेको स्रोतको भनाइ छ । 

स्रोतकाअनुसार घनश्याम भुसालले आफ्नै फोनबाट प्रधानमन्त्री ओलीसँग संवाद गराएका थिए । ओलीसँगको कुराकानीमा नेता नेपालले शनिबारको बैठकमा उपस्थित नहुने स्पष्ट सन्देश दिएको उनी निकटस्थहरू बताउँछन् ।

नेपालनिकट स्रोतले दिएको जानकारी अनुसार राजनीतिक र संगठनात्मक कोर्स करेक्सन नहुँदासम्म बैठकमा उपस्थित हुने होइन वार्तासमेतको उपादेयता नरहने स्पष्ट अडान राखेका थिए ।

“माधव नेपालले अहिले जारी बैठक सर्वोच्च अदालतको फैसला अनुरूप २०७५ जेष्ठ २ को नभइ २०७७ फाल्गुण २८ कै निर्णयको निरन्तरता देखिएकोले र आवश्यक सल्लाह एवम् परामर्शबिना आयोजना गरेकोले त्यसलाई रोक्न,  राजनीतिक र संगठनात्मक कोर्ष करेक्सन गर्न एवम् पहिले निर्माण गरेको वार्ता कमिटिलाई क्रियाशील बनाई औपचारिक वार्ता सुरु गर्न आग्रह गर्नुभएको छ,” नेता नेपालनिकट स्रोतले बाह्रखरीसँग भन्यो ।

त्यस्तै नेता नेपालले संसद् विघटनसम्बन्धी विचाराधीन मुद्दाका सन्दर्भमा अदालतबाट आउने फैसलालाई स्वीकार मात्र गर्न सकिने तर हस्ताक्षर फिर्ता लिन नसकिने कुरामा अडान राखेको पनि स्रोतको जिकिर छ । एकतालाई अदालतको मुद्दाले कुनै असर नगर्ने तर हस्ताक्षर फिर्ताको शर्त ‘अर्घेल्याइँ’ भएको नेपालको बुझाइ रहेको उनीनिकट स्रोत बताउँछन् ।

प्रधानमन्त्री ओलीले ‘संगठनात्मक कोर्स करेक्सन’मा ध्यान नै नदिने तर हस्ताक्षर फिर्ता लिन मात्र एकोहोरो आग्रह गरिरहेकाले एकताको सम्भावना टाढिएको पनि नेता नेपालनिकट नेताको भनाइ छ ।