![सप्तकोसीमा खतराको रातो बत्ती, इटहरीका अधिकांश भाग डुबानमा](https://12khari.top/uploads/posts/Biratnagar Sukumbasi Basti1625312529.jpg)
विराटनगर । लागतारको वर्षासँगै सप्तकोसी नदीमा पानीको बहाव बढेको छ । शनिबार बिहान यो वर्षकै उच्च बहाव मापन गरिएपछि सप्तकोसी ब्यारेजमा खतराको रातो बत्ती बालिएको छ ।
शनिबार नदीमा पानीको बहाव दुई लाख ३१ हजार ६५५ क्युसेक प्रतिसेकेन्ड पुगेपछि ब्यारेजका ३० वटा ढोका खोलिएको छ । आवश्यकताअनुसार थप ढोका खोल्न भारतीय पक्षलाई नेपाली पक्षबाट आग्रह गरिएको छ ।
सुनसरीका प्रमुख जिल्ला अधिकारी उमेशकुमार ढकालले तटीय क्षेत्रमा सतर्क रहन आह्वान गरिएको बताए । लगातारको वर्षासँगै प्रदेश नम्बर–१ का झापा, मोरङ, सुनसरी र उदयपुरका खोलाहरु उर्लिएका छन् । कतिपय स्थान डुबानमा परेका छन् ।
डुबानबाट सबैभन्दा धेरै इटहरी प्रभावित भएको छ । इटहरीको आइतबारेसहितका क्षेत्रका घर डुबानमा परेका छन् । इटहरी–विराटनगर सडक जलमग्न भएपछि खनासम्म डाइर्भसन बनाएर सवारीसाधन सञ्चालनको प्रबन्ध गरिएको छ ।
निरन्तरको वर्षाका कारण सुनसरीका अधिकांश क्षेत्र जलमग्न भएका छन् । बूढी र टेंग्राखोलाको पानी बस्तीतिर पसेको हो । जिल्ला प्रहरी कार्यालय सुनसरीको अनुसार २०० परिवारलाई सुरक्षित स्थानमा सारिएको छ । सुनसरीको भोक्राहानरसिंह र हरिनगरामा १४ घर डुबानमा परेका छन् ।
![Global Ime bank](https://baahrakhari.com/uploads/bigyaapan/30885600.gif)
प्रदेश–१ को राजधानी विराटनगरस्थित सिंघियाखोलाको पानी बस्तीमा पसेपछि हाटखेला क्षेत्रको सुकुम्बासी बस्ती डुबानमा परेको छ । विराटनगर महानगरपालिका–८ का २६ परिवार विस्थापित भएका छन् ।
यसैगरी, बखरी, ब्रम्हपुरा, जतुवा डुबानमा परेका छन् । सुनवर्षीमा बख्राहा खोलाले कटान सुरु गरेको छ ।
झापाको दमकमा वर्षाको पानी सडकमाथिबाट बगेको छ । उदयपुरमा पनि त्रियुगासहितका खोलामा पानीको बहाव बढेको छ ।