काठमाडौं । थापाथलीस्थित परोपकार प्रसूति तथा स्त्रीरोग अस्पतालको नयाँ भवनबाट सेवा सुरु गरिएको छ । कुपण्डोलस्थित छतले भवनबाट आइतबारदेखि सुरक्षित गर्भपतन, परिवार नियोजन सेवा दिन थालिएको हो ।

भवनको भुइँ तलामा हेल्प डेस्क, टिकट काउन्टर, फार्मेसी, ओपीडी, भिडियोे एक्सरे र ल्याब सेवा छन् । पहिलो र दोस्रो तलामा सुरक्षित गर्भपतन र परिवार नियोजन सेवा सञ्चालन गरिएको छ ।

तेस्रो तलामा तालिम हल र सिमुलेसन ल्याब राखिएको छ । चौथो र पाँचौँ तला छात्रावासका निम्ति प्रयोग गरिएको छ । सबैभन्दा माथिल्लो तला किचनका निम्ति छुट्ट्याइएको छ ।

निःसन्तानपनसम्बन्धी सम्पूर्ण सेवा (आईभीएफ) र नर्सिङ क्याम्पस पनि कुपण्डोलबाटै सञ्चालित छन् ।

स्त्रीरोगसम्बन्धी ओपीडी, गर्भवती, प्रसूति र नवजात शिशुबारेको सेवा भने थापाथलीस्थित पुरानै भवनबाट दिइँदै छ ।

४३ करोड ५९ लाख रुपैयाँ लागतमा नयाँ भवन बनाइएको अस्पतालका निर्देशक डा. श्रीप्रसाद अधिकारीले जानकारी दिए । नयाँ भवनमा एक्सरे, अल्ट्रासाउन्ड मेसिनलगायत उपकरण किन्ने योजना रहेको उनले बताए ।

प्रसूतिसम्बन्धी अभ्यासका निम्ति बनाइएको सिमुलेसन ल्याब सञ्चालनको आर्थिक जिम्मेवारी वान हार्ट नेपालले लिएको छ । सिमुलेसन ल्याबमा  विद्यार्थी तथा स्वास्थ्यकर्मीले प्रसूतिसम्बन्धी सम्पूर्ण प्रक्रियाको ‘प्राक्टिकल’ गर्नेछन् ।

सबैखाले ओपीडीमा अनलाइन टिकटको व्यवस्था गरिएको छ । अस्पतालको वेबसाइटमा गएर तथा आमाको माया एपमार्फत अनलाइन टिकट लिन सकिने डा. अधिकारीले बताए ।

परोपकार प्रसूति तथा स्त्रीरोग अस्पतालबाट गएको वर्ष एक लाख ६१ हजारजनालाई ओपीडी र २२ हजारलाई प्रसूति सेवा दिइएको तथ्यांक छ ।