काठमाडौं । ललितपुर महानगरपालिकाका मेयर र उपमेयर अल्पमतमा पर्दा आर्थिक वर्ष २०७८/०७९ को बजेट प्रस्ताव पेश हुन सकेन । महानगरपालिकाको नगरसभामा अधिकांश विपक्षी नगरसभा सदस्यहरू अनुपस्थित हुँदा बजेट प्रस्ताव पेश नगरिएको महानगरले जनाएको छ ।

महानगरका प्रवक्ता राजु महर्जनका अनुसार आजको नगरसभामा ९२ विपक्षी नगरसभा सदस्यहरूमध्ये ६६ जना उपस्थित नहुदा बजेट पेश गर्न नसकिएको जानकारी दिए ।

‘‘महानगरपालिकामा २९ ओटा वडा कार्यालयहरू रहेका छन् । जसमध्ये १० वटा वडा कार्यालयमा नेपाली कांग्रेसका वडा अध्यक्ष छन् । र अन्य वडा कार्यालयहरूमा विपक्षी जनप्रतिनिधीहरू रहेका छन्,” प्रवक्ता महर्जनले भने, ‘‘नेपाली कांग्रेसबाहेक अन्य नगरसभा सदस्यहरूले बहिस्कार गर्दा बजेट नै पेश गर्न सकिएन । अब शनिबार बजेट पेश गर्ने भन्ने कुरा छ । विपक्षी नगरसभा सदस्यहरू आउने अपेक्षा राखेका छौँ, सम्पर्क पनि गरिरहेका छौँ ।”