काठमाडौं । निषेधाज्ञा खुकुलो भएसँगै काठमाडौं उपत्यका छाड्नेको चाप बढेको छ । सरकारले असार १ गतेदेखि निषेधाज्ञा खुकुलो गरेपछि उपत्यका छाेडेर घर फर्किनेको संख्यामा वृद्धि भएको हो ।

बिहीबार काठमाडौंको नयाँ बसपार्क पुग्दा उपत्यका छोड्नेको संख्या बाक्लो देखिन्थ्यो । कोरोना महामारीका कारण काठमाडौंमा बस्न गाह्रो भएपछि काठमाडौं छोड्नुपरेको कैलालीका श्याम पातलीले बताए । उनले लामो समय काठमाडौंमा बसेर घरपरिवारको खर्चको जोहो गरेपनि अब कमाइ हुन छोडेपछि घर फर्किन लागेको बताए ।

यस्तै दाङका मोहन शाही पनि रोजगारविहीन हुँदा काठमाडौंमा खर्च धान्नै गाह्रो भएपछि सहज परिस्थिति नहुन्जेलसम्मका घर फर्किएका छन् ।

निरन्तरको निषेधाज्ञाले आर्थित तथा मनावैज्ञानिक समस्या उत्पन्न हुन थालेपछि दैनिक रूपमा हजारौँ मान्छेले उपत्यका छोड्ने गरेको प्रहरीले जनाएको छ । प्रहरीकाअनुसार अहिले नयाँ बसपार्कबाट दैनिक १५ देखि २० बस छुट्ने गरेका छन् ।

कोरोना महामारीको दोस्रो लहरको जोखिम कम गर्न सरकारले गत वैशाख १६ गतेदेखि काठमाडौं उपत्यकासहित देशका विभिन्न जिल्लामा निषेधाज्ञा जारी गरेको थियो । पछिल्लोपटक काठमाडौं उपत्यकामा असार ७ गतेसम्म निषेधाज्ञा जारी गरिएको छ । 

सबै तस्बिरहरू : हरिशजंग क्षेत्री/बाह्रखरी