काठमाडौं । संस्कृति, पर्यटन तथा नागरिक उड्डयन मन्त्री उमाशंकर अरगरियाले नेपाल वायुसेवा निगमबारे जानकारी लिएका छन् । निगम कार्यालय पुगेको उनले निगमसँग भएका विमानहरूको पूर्ण उपयोग गरी नाफामूलक अवस्थामा पुर्‍याउन आग्रह गरे । “दक्षता र योग्यताको आधारमा जनशक्तिको उचित उपयोग गर्दै निगमले विगतमा बनाएको प्रतिष्ठा पुनःप्राप्ति गर्न सामुहिक प्रयासको आवश्यकता तर्फ ध्यान दिनुपछ,” उनले भने ।

निगमले कोरोनाको महामारीमा आफ्नो जिम्मेवारी सक्षमताकासाथ पूरा गरेको उनले बताए । उनले अझ दरिलो कार्ययोजना सहित अघि बढ्न तत्कालै योजना बनाउन र गुमेको बजार पुनः प्राप्त गर्न ठोस कार्यको आवश्यकता औल्याए । उनले निगम नाफामूलक मात्र होइन, सेवामूलक समेत हो भन्ने अवधारणासहित अगाडि बढन सल्लाह दिंदै सरकारका तर्फबाट पूर्ण सहयोग हुने बताए ।

संस्कृति, पर्यटन तथा नागरिक उड्डयन मन्त्रालयका सचिव यादव कोइरालाले नयाँ परिप्रेक्ष्यमा निगमलाई ठोस कार्ययोजना सहित अगािड बढाउनु पर्ने आवश्यकता औल्याए । उनले निगमलाई परम्परागत ढंगमा अगाडि बढाउन नसकिने यथार्थलाई अंगीकार गर्दै नयाँ मोडेलमा परिवर्तन गरी प्रगति तर्फ लैजान सम्वन्धित क्षेत्रको भूमिका उल्लेखनीय रहने बताए । संस्थालाई कसरी नयाँ मोडेलमा लैजाने भन्ने कुरामा विभिन्न विकल्प बारे अध्ययन गर्नुपर्ने उनको भनाइ छ ।

निगमका महाप्रवन्धक डिमप्रसाद पौडेलले विगतका गतिविधि र कार्ययोजनाबारे जानकारी गराए । निगमलाई तत्काल अन्तर्राष्ट्रिय विमान कम्पनी बनाउन नसकिए पनि क्षेत्रिय कम्पनीको रुपमा सक्रिय र सक्षम बनाउन निगम परिवार सकारात्मक रूपमा लागि परेको उनले बताए । भैरहवा र पोखराको विमानस्थलको ग्राउन्ड ह्यान्डलिङ सेवा वापतको राजश्वमा  ५ वर्षका लागि छुट गराउन र सरकारी कर्मचारीले अन्तर्राष्ट्रिय उडानमा निगमको विमान प्रयोग गर्नुपर्ने प्रावधान राख्न आग्रह गरे ।