काठमाडौं । वैशाख २७ को मिति नजिकिँदै गर्दा एमालेभित्र सघन बन्दै गएको विवाद संवादतिर फर्किएको छ । नेकपा एमालेका नेता अर्थमन्त्री विष्णु पौडेल, नेता सुरेन्द्र पाण्डे र गोकर्ण विष्टबीच बिहीबार अपराह्न साढे चार बजे नक्सालको मेरियट होटलमा वार्ता, छलफल भएको हो ।
चैत ९ गते ४ जना नेतालाई स्पष्टीकरण पत्र थमाएका प्रधानमन्त्री केपी शर्मा ओलीले चैत १६ गते माधवकुमार नेपाल र भीम रावललाई ६ महिनाका लागि साधारण सदस्यबाट निलम्बन गरेका थिए । त्यसको तीन दिनपछि घनश्याम भुसाल र सुरेन्द्र पाण्डेलाई उस्तै प्रकृतिको कारबाही गरिएको थियो ।
त्यसयता एमालेका दुई ध्रुव बनेका प्रधानमन्त्री ओली र माधवकुमार नेपाल समूहबीच सार्थक संवाद हुन सकेको थिएन । नेता नेपाल समूहले समानान्तर गतिविधिलाई व्यापकता दिँदै आएको थियो ।
प्रधानमन्त्री ओली सांसदहरू समेतलाई स्पष्टीकरणको पत्र थमाएर वरिष्ठ नेता झलनाथ खनाल र नेता नेपाल समूहबीच अझै निर्मम बन्ने संकेत देखाइरहेका थिए ।
तर, प्रधानमन्त्रीले सदनमा विश्वासको मत लिने निचोडमा पुगेसँगै उत्कर्षतिर अभिमुख भएको एमाले विवाद संवादतिर फर्किएको नेताहरूले बताएका छन् ।
नेता पाण्डेले आज (बिहीबार) बाट छलफलको आरम्भ भएको जानकारी दिए । “विष्णु पौडेलले आज ४ बजे भेटौँ भन्नु भएको थियो । म र गोकर्ण विष्ट छलफलका लागि गएका थियौँ । कुराकानीमा कुनै ठोस प्रस्ताव अघि त सारिएन तर सकारात्मक थालनी भएको छ,” उनले यति मात्रै भएन ।
ओली समूहले पनि छलफल सकारात्मक भएको बताएको छ । बाहिर प्रचार गरिएजस्तो खनाल–नेपाल समूह सामूहिक राजीनामाका निम्ति अग्रसर नहुने बरु मिलन विन्दुको खोजी गरिरहेकाले संवादले त्यसलाई बाटो देखाउन सक्ने उनीहरूको बुझाइ छ ।
बिहीबार नै राष्ट्रपति विद्यादेवी भण्डारी र नेता नेपालबीच शीतल निवासमा भेटवार्ता भएको छ । पार्टीभित्रको विवाद उत्कर्षतिर अघि बढ्दा यसअघि पनि राष्ट्रपति भण्डारीले नेताहरूलाई बोलाएर छलफल गर्ने गरेकी थिइन् ।
एमालेभित्रको विवाद निर्णायक मोडमा पुगेका बेला र सदनमा मतमार्फत् अभिव्यक्त हुनै आँट्दा पुनः राष्ट्रपतिले सक्रियता देखाएकी छिन् । यसले पनि एमालेभित्रको विवाद साँघुरिन मद्दत पुग्ने नेताहरूले विश्वास व्यक्त गरेका छन् ।
आजै स्थायी कमिटी बैठकमा नेता नेपाल समूहमाथिको कारबाही रोक्नेबारे छलफल भएको नेताहरूले बताएका छन् । स्पष्टीकरण सोधिएका ३० नै जनाको जवाफ आइसकेकाले उनीहरूलाई थप कारबाही हुन्छ कि भन्ने आशंका गरिएको थियो । उनीहरूलाई थप कारबाही गर्ने अख्तियारी स्थायी कमिटीलाई वैशाख १० गतेको केन्द्रीय कमिटी बैठकले दिएको पनि थियो ।
तर, आज कारबाही फिर्ताबारे विषय उठे पनि कुनै निर्णय नभएको संसदीय दलका उपनेता सुवास नेम्वाङले जानकारी दिए । “बैठकमा विषय त आउने नै भयो । तर, कुनै निर्णय भएको छैन,” उनले भने ।