काठमाडौं । गण्डकी र सुदूरपश्चिम प्रदेशका आफूनिकट प्रमुखहरू हटाइएपछि नेकपा माओवादी केन्द्र क्षुब्ध बनेको छ ।

पार्टीका प्रवक्ता नारायणकाजी श्रेष्ठले प्रधानमन्त्री केपी शर्मा ओली नेतृत्वको मौजुदा सरकार फासीवादी दिशामा अघि बढेको बताएका छन् ।

निरन्तर निरंकुशताको बाटो हिँडिरहेको ओली सरकारसँग योबाहेक अरू अपेक्षा गर्न नसकिने उनको निष्कर्ष छ । बाह्रखरीसँग संक्षिप्त कुराकानी गर्दै श्रेष्ठले भने, “फासिस्ट दिशातिर, निरंकुश दिशातिर योजनाबद्धरूपमा अघि बढिरहेको सरकार, सरकारलाई सहयोग गर्ने राष्ट्राध्यक्षबाट अरू के अपेक्षा गर्न सकिन्छ र ! संविधान, लोकतान्त्रिक मूल्य मान्यता, कानुन सबैलाई ध्वस्त बनाइराखिएको छ ।”

ओली सरकार संविधान र कानुनको आधारमा नचल्ने हुनाले उनका गतिविधि टिप्पणी गर्न पनि लायक नरहेको उनको आसय थियो ।  “सरकार निरन्तर रूपमा संविधान, कानुन ध्वस्त पार्न लागेको छ । फासीवादलाई बलियो बनाउन केके गर्न सकिन्छ गर्दै गएको छ । यो अत्यन्तै क्रूर, निरंकुश निर्णय हो,” उनको आक्रोश थियो ।

सोमबार बसेको मन्त्रिपरिषद् बैठकले सुदूरपश्चिम प्रदेशका प्रमुख सर्मिला पन्त त्रिपाठी र गण्डकी प्रदेशका प्रमुख अमिक शेरचनलाई पदमुक्त गर्न सिफारिस गरेको थियो । सरकारको सिफारिस राष्ट्रपति विद्यादेवी भण्डारीले सदर गरिसकेकी छन् । आजै बसेको मन्त्रिपरिषद् बैठकले गण्डकी प्रदेश प्रखुमा सीता पौडेल र सुदूरपश्चिम प्रदेशमा गंगा यादव सिफारिस गरिसकेको छ । दुवै एमालेनिकट हुन् । उनीहरूलाई केहीबेरमा शपथ गराउने तयारी रहेको राष्ट्रपति कार्यालयले जानकारी दिएको छ ।