बग्दाद । इराकको एक अस्पतालमा आगलागी हुँदा कम्तीमा २३ जनाको मृत्यु भएको छ । राजधानी बग्दादस्थित इब्न खातिब अस्पतालमा आगो लाग्दा २३ कोरोना संक्रमितको मृत्यु भएको छ भने अन्य दर्जनौँ घाइते भएका छन् ।

अस्पतालमा रहेको अक्सिजन सिलिन्डर पड्केर आगलागी भएको बीबीसीले जनाएको छ । अस्पतालमा रहेका १२० बिरामीमध्ये ९० जनाको उद्धार गरी अन्य अस्पतालमा सारिएको जनाइएको छ ।

अस्पतालको गहन उपचार कक्ष (इन्टेन्सिभ केयर युनिट मा आगो लागेको यहाँका नागरिक रक्षा प्रमुख मेजर जनरल कदिम बोहनले सरकारी सञ्चारमाध्यमलाई जानकारी दिएका छन् । स्थानीय समयानुसार शनिबार राति लागेको आगो आइतबार बिहान मात्र नियन्त्रणमा आएको थियो ।

घटनालाई दुखद् भन्दै इराकी प्रधानमन्त्री मुस्तफा अल–कदिमीले घटनाको तुरुन्त छानबिन गर्न निर्देशन दिएका छन् । यहाँको मानवअधिकार आयोगले एक विज्ञप्ति जारी गर्दै घटनालाई ‘कोभिड–१९ बाट थकित बिरामीविरुद्धको अपराध’ भनेको छ ।

गएको फेब्रुअरीदेखि पुनः तीव्र रुपमा संक्रमण बढेको इराकमा यो सातासम्म कोरोना संक्रमितको संख्या १० लाख नाघेको छ । यहाँको स्वास्थ्य मन्त्रालयका अनुसार गत वर्ष कोरोना महामारी सुरु भएयता यहाँ १५ हजार २१७ संक्रमितको मृत्यु भइसकेको छ ।