काठमाडौं । नेकपा (एमाले)का अध्यक्ष तथा प्रधानमन्त्री केपी शर्मा ओलीले आफूले पार्टी एकताका लागि पहल गरे पनि नेता माधवकुमार नेपाललगायतले पहल नगरेको आरोप लगाएका छन् ।
शुक्रबार बालुवाटारमा महाधिवेशन आयोजक कमिटीको बैठकलाई सम्बोधन गर्दै ओलीले नेता नेपाल, योगेश भट्टराईसँगको छलफलमा आफू लचिलो भए पनि उनीहरु एकताको पक्षमा नरहेको बताएका हुन् ।
“म अझै पनि लचिलो भएर आएको छु । मेरो माधव नेपाल, योगेश भट्टराईलगायत नेताहरूसँग भेटघाट भयो । दुई कदम पछाडि, एक कदम अगाडि बढेर हिँड्नुपर्छ भन्ने लेनिनको शैली अपनाउन तयार भएर कुरा गरेँ । तर, साथीहरुको पार्टी एकताबद्ध बनाउन कुनै पहल महसुस र अनुभूति देखिँदैन,” बैठकमा ओलीले भने, “पार्टी खोस्ने ढंगले कोही आएको हो भने त्यो सम्भव छैन । कम्युनिस्ट पार्टी नयाँ उचाइ, सान र गौरवका साथ अगाडि बढ्दछ । यसको नेतृत्व र पहल एमालेले गर्नेछ ।”
ओलीले पार्टी एकताबद्ध बनाउन आफू अहोरात्र खटेको पनि बताए । उनले तत्कालीन नेकपा नेता नेपाल र पुष्पकमल दाहाल ‘प्रचण्ड’को स्वार्थका कारण विभाजित भएको जिकिर पनि गरे ।
“हामी जिम्मेवार र अनुशासित भएकोले हामीले यो पार्टी एकता कायम गर्न प्रयास गर्छौँ । यत्रो दुःखबाट एकीकृत गरेको पार्टी प्रचण्ड र माधव कमरेडहरुले आफ्नो महत्वाकांक्षा र स्वार्थको कारण हाम्रो पार्टी पुनः विभाजित भयो । विभाजित नभएको भए पनि यति धेरै शत्रुतापुर्ण सम्बन्ध बनाइसक्नुभएको थियो,” ओलीको भनाइ उद्धृत गर्दै एक नेताले भने, “मलाई साधारण सदस्यबाट समेत हटाउने दुस्साहस गर्ने । त्यस्ता व्यक्तिहरु नेतृत्वमा हावी हुँदा त्यो पार्टी आकारमा त ठूलो देखिन्थ्यो । तर, समाजलाई गति दिन र नेतृत्व लिन सक्ने हैसियतमा हुने थिएन ।”
ओलीले नेता नेपालप्रति लक्षित गर्दै अराजक ढंगले लागेको आरोप पनि लगाए । सरकारको आलोचना गर्ने, बदनाम गराउने हिसाबले लागेको उनको भनाइ थियो ।
