काठमाडौं । सोमबार नेविसंघ स्थापना दिवसको कार्यक्रममा कांग्रेस महामन्त्री डा. शशांक कोइरालाले आफ्ना सभापति शेरबहादुर देउवालाई हौस्याउने प्रयास गरे । कांग्रेस केन्द्रीय समिति बैठकबाट गत चैत २० मै प्रधानमन्त्रीको राजीनामा माग्ने निर्णय गरेको छ भने वर्तमान सरकारको विकल्प खोज्न अग्रसरता लिने पनि निर्णय गरेको छ ।
तर, पार्टीको केन्द्रीय समितिबाट यस्तो निर्णय गरेका सभापति शेरबहादुर देउवाले त्यो अग्रसरता भने लिएका छैनन् । २७ चैतमा माओवादी केन्द्र र जनता समाजवादीलाई निवासमै डाकेर छलफल गरेका देउवा त्यसयता राजनीतिक छलफलमा समेत क्रियाशीलता देखाएका छैनन् । बरु उनले भने, “सरकार बहुमतमै रहेकाले तत्काल विकल्प सम्भव छैन ।”
यस्तै भनाइका कारण देउवाले ओली सरकारको निरन्तरता चाहेको टिप्पणी भइरहेको छ ।
त्यसको जवाफमा देउवाले आफूले ओली सरकारको विकल्प चाहेको भए पनि सम्भव नभएको स्पष्टीकरण दिएका छन् ।
“मैले ओलीलाई हटाउन चाहेको छैन भनिँदैछ । चाहेको छु नि किन नचाहनु मैले ?,” आरोप लगाउनेलाई प्रश्न गर्दै देउवाले भने, “तर स्योर सट हु्नुपर्छ, स्योर सट है ! यसका विषयमा सल्लाह त हुँदैछ । तर अहिले नै केही हुने अवस्था छैन ।” उनले प्रचण्डले समर्थन फिर्ता नलिएको र मधेसवादी दल ओलीलाई समर्थन गर्न तयार भएकाले त्यो सम्भव नभएको बताएका छन् ।
सभापति देउवाले यही कुरा पटक पटक दोहोर्याउँदै आएका छन् । तर, महामन्त्री शशांकले भने यसका वाबजुत पनि यो सरकार विस्थापनको संकल्प लिन सभापति देउवालाई आग्रह गरेका छन् । उनले ओलीविरुद्ध उनकै पार्टीबाट संसदमा ‘फ्लोर क्रस’ हुने दाबी गर्दै सभापति देउवालई अघि बढ्न आग्रह गरेका हुन् ।
“म यही मञ्चबाट हाम्रो श्रद्धेय सभापतिजीलाई आग्रह गर्नु चाहन्छु कि शेरबहादुरजीले के संकल्प गर्नुपर्यो भने हामीले सरकारलाई अपदस्त गर्नैपर्छ,” शशांकले भने, “यो सरकार भयो र चुनाव गरायो भने हामीलाई समाप्त पार्ने प्रयास हुन्छ । हामीलाई धेरै ठूलो क्षति हुन्छ ।”
उनले सभापतिको विश्लेषण सीधा हिसावले सही भए पनि ओलीविरुद्धको आक्रोस उनकै पार्टीभित्र धेरै रहेको दाबी गरे ।
“सभापतिजी भन्दै हुनुहुन्छ, प्रचण्ड र हामीले मात्र सरकार बन्दैन । तर, यो सरकारको विकल्पका लागि फ्लोर क्रसिङ हुन्छ । छ नम्बर प्रदेशमा देखिसकेको छ –फ्लोर क्रसिङ कसरी हुन्छ भनेर,” शशांकले भने, “यहाँ पनि माधव नेपाल, झलनाथ खनाल पक्षका मान्छेहरु छन् । उनीहरुले फ्लोर क्रस गर्छन् र हाम्रो नेतृत्वमा सरकार बन्न सक्छ ।”
शशांकले देशको हितका लागि पनि ओली सरकार राख्नु उचिन नहुने बताए ।
“यहाँ मान्छेलाई खाने लाउने छैन, उहाँ दशकौँपछिको पानी जहाज र रेलको सपनामा भुलाउने प्रयास गर्दै हुनुहुन्छ । जनतालाई यसरी धोका दिएर सरकार संचालन हुन्छ ?,” प्रश्न गर्दै शशांकले भने, “उहाँ झुठा आश्वासन दिएर सत्ता चलाइ रहनुभएको छ ।”
उनले झुठा आश्वासनले देशलाई थप दुर्घटनामा लैजाने र जनतालाई निराशामा पुर्याउने भन्दै सरकारको विकल्प अनिवार्य भएको बताए ।