काठमाडौं । प्रधानमन्त्रीसमेत रहेका नेकपा एमालेका अध्यक्ष केपी शर्मा ओलीले नेता माधवकुमार नेपालसहितका नेताहरुलाई कारबाही गर्ने बताएका छन् ।
सोमबारदेखि सुरु केन्द्रीय कमिटी बैठकलाई सम्बोधन गर्दै उनले यस्तो बताएका हुन् ।
“माधव नेपालले इतिहासमै पहिलोपटक अलोकतान्त्रिक, गैर संसदीय, अराजक हर्कत गरेका छन्,” ओलीको भनाइ उद्धृत गर्दै स्रोतले भन्यो, “प्रचण्डको पाउमा एमाले पार्टी चढाउने ? कांग्रेसलगायत गैरकम्युनिष्टको नेतृत्वमा सरकार बनाउन हामी फ्लोर क्रस गर्छौँ भन्दै रोदन गरेका छन् ।”
उनले पार्टीविरुद्ध यस्तो घातक कदम चाल्नेलाई कारबाही गर्ने बताएका हुन् ।
“कलंकको टीका केपी ओलीले लगाउनेछन् भनेर माधव नेपाल र प्रचण्डले भन्न भ्याएछन्,” ओलीको भनाइ थियो, “प्रचण्डको दुईमुखे प्रवृत्तिले समस्या आएको हो । एकातिर देशभक्तिको कुरा गर्ने अर्कोतर्फ आपराधिक र भ्रष्टाचार गर्ने ।”
माधव नेपाल र प्रचण्डलाई अब जनताले धुलो चटाउने बताए ।
“पत्रकार महासंघमा चुनाव जितेर केपी ओलीलाई धुलो चटाइयो भनेछन्,” ओलीके भनाई थियो,” उनले भने, “त्यहाँ जितेर के उपलब्धि भयो मैले बुझ्न सकिन । चार पार्टी मिलेर होइन एक एक गरेर चुनाव लडौँ के हुन्छ त्यहीँ देखिन्छ ।”
चुनावमा नजित्ने र चुनावपछि गठबन्धन गर्न कोही आउने नदेखेर अहिले प्रचण्ड छटपटिएको उनको टिप्पणी थियो ।
