काठमाडौं । नेपाल पुलिस क्लबलाई पराजित गर्दै न्यू डायमण्ड क्लब पाँचौ एनभीए राष्ट्रिय महिला तथा पुरुष लिग भलिबल च्याम्पियनसिपको महिलातर्फ शीर्ष स्थानमा उक्लेको छ ।
मंगलबार भएको खेलमा डायमण्डले पुलिसलाई २५।२२, २५।२२, २५।१६ को सोझो सेटमा पराजित गरेको हो ।
यसका साथै डायमण्ड ४ खेलबाट कुल १० अंकका साथ शीर्ष स्थानमा उक्लन सफल भएको हो । एपीएफ क्लबको पनि समान १० अंक रहेता पनि सेट अन्तरका कारण एपिएफ दोश्रो स्थानमा छ ।
आजनै भएको खेलमा एपीएफले भरतपुर मेट्रो क्लबलाई २५।१३, २५।७, २५।९ को सोझो सेटमा पराजित गरेको हो ।
एपीएफको पनि ४ खेलबाट १० अंक छ । यस्तै तेश्रो स्थानमा ८ अंकका साथ त्रिभुवन आर्मी क्लब र ८ अंकमै रहेको नेपाल पुलिस क्लब सेट अन्तरका कारण चौथो स्थानमा रहेको छ ।
दशरथ रङ्गशाला कभर्डहलमा भएको प्रतियोगिताको पुरुषतर्फ नेपाल पुलिस क्लबले जित निकालेको छ । पुलिसले एपीएफमाथि पहिलो र दोश्रो सेट २५।२१, २५।२३ ले आफ्नो पक्षमा पार्दै जित नजिक पुगेको पुलिस तेश्रो र चौथो सेट २० । २५, १७ । २५ ले एपीएफलाई सुम्पन पुग्यो ।
पाँचौ तथा अन्तिम सेटमा १५ । १३ अंकले जित हात पार्दै २ अंक जोड्न पुग्यो । एपिएफले १ अंक जोड्यो । पुलिसको ५ खेलबाट ९ अंक रहेको छ ।
त्यस्तै हारका बावजुत एपीएफको १० अंक भएको छ । यस्तै अर्को खेलमा टिपटप हेल्प नेपाल क्लबले त्रिभुवन आर्मी क्लबलाई २५। १७, २५ । १९, २५ ।१६ ले पराजित गर्यो । सोझो सेटमा पराजित गरेको हेल्पले आफ्नो अंक तालिकामा महत्वपूर्ण ३ अंक जोड्दै १५ अंकका साथ शीर्ष स्थान कायमै राखेको छ ।
प्रतियोगितामा लिगमा शीर्ष दुई स्थानमा रहेका टिम उपाधीका लागि प्रतिस्पर्धा गर्ने छन् ।
