महिला  राष्ट्रपति भएको देशमै महिलाले आफ्नो स्वतन्त्रता गुमाउनु, महिला अधिकार सुनिश्चित नहुनु, महिला अन्यायमा पर्नु पितृसत्तालाई दोषी भन्दै पुरुषलाई मात्र दोषी बनाउनु एक्काइसौं शताब्दी सुहाउँदाे हाेइन । योग्यता क्षमता र साहस  भएका र पुरातन सत्तासँग लड्न सक्ने लगनशीलता उवं इमानदार महिला नेपालमै धेरै माथि पुगेका छन् । महिला राष्ट्रपति, सभामुख, प्रधान न्यायाधीश भएका हामीले देखेकै हाे । 

त्यसो भए महिलाहरू दमनमा पर्नु ,हिंसामा पर्नु, अन्यायमा पर्नु, घरभित्रमात्र सीमित हुनु, बलात्कृत हुनु, समाजमा महिलालाई हेर्ने विभेदकारी दृष्टिकोण र उनीहरूप्रति गरिने व्यवहारमा पुरुषको कुनै गल्ती, कमजोरी र दाेष छैन त ? पक्कै छ । यो सबैको पछाडि पुरुषकै दोष छ ।पुरातनपन्थी सत्ता र सोचको नै दोष छ र रहिआएको पनि छ । 

हाम्रो देशमा फरक  संस्कृतिका  र फरक सोचका पुरुष छन् । केहीले अझै पुरातन सोच राख्छन् । महिला हक र अस्मिता हनन गरेर नारीलाई खेलौना ठानेर व्यवहार गर्ने पुरुष सत्ता समाजमा अझै पनि जिउँदै छ । तैपनि, पुरुषले महिला प्रतिगर्ने व्यवहार र हेर्ने दृष्टिकोणमा केही परिवर्तन आउँदैछ । समाज शिक्षित हुँदै छ भने बिस्तारै महिला पनि सक्षम हुँदै छन् । अन्याय अत्याचारविरुद्ध आवाज उठाउन थालिएकाे छ । 

महिलाहरू घरभित्र सीमित नभएर विभिन्न क्षेत्रमा अगाडि आउआदै छन् ।   केही शिक्षित र सक्षम पुरुषले पनि महिलालाई राम्रैसँग साथ दिएका छन्  । पुरातन सोच र प्रथाका नाममा समाजमा रहेको पुरुष सत्ताको अन्त्य नै भने भएको छैन । 

समाजमा रहेको महिला पुरुष विभेदको अन्त्य गर्नै पर्छ । त्यसको लागि महिलाले आफ्नो हक र स्वतन्त्रताका लागि लड्नै  पर्छ  । पुरुषले पनि पुरातन सोच त्यागेर महिलालाई सहयोग  गर्नुपर्छ ।

हिजो महिला घरायसी चुलो चौकीमै मात्र सीमित गराइए । नारी स्वतन्त्रतामा बन्देज लगाइयाे । आज महिला बिस्तारै शिक्षित हुँदै गए । क्षमता विकास गर्दै गए । समाज थोरै भए पनि विकसित हुँदै गयो । महिला क्षमतावान हुँदै योग्यता हासिल गर्दै पुरातन समाजसँग लड्दै गए ।

त्यसैले महिला हक अधिकारको लागि स्वतन्त्र र समावेशी समाज निर्माणमा पुरुषहरूको सोच र महिलालाई हेर्ने दृष्टिकोण  नै परिवर्तन गरी नयाँ शताब्दीमा महिलालाई पुरुष समानन  दर्जामा राख्नु नै विकसित  समाजको परिचय  हो । त्यसका लागि महिला आफैँले पनि विभिन्न परिस्थिति बुझेर सही र गलत पहिचान गरी इमानदारीसाथ पुरुष सत्ता, समाज र देशमा आफ्नो हक र अधिकारको लाग निरन्तर लड्नु जरूरी छ ।