काठमाडौं । सर्वोच्च अदालतले संसद् विघटन बदर गरेपछि प्रधानमन्त्री केपी शर्मा ओली आफूनिकट सांसदहरुसँग छलफलमा जुटेका छन् । ओलीले प्रदेश नम्बर–१ बाट प्रतिनिधित्व गर्ने सांसदहरुसँग शुक्रबार बालुवाटारमा छलफल गरेका हुन् ।
समसामयिक घटनाक्रमबारे छलफल भएको छलफलमा सहभागी सांसद विशाल भट्टराईले जानकारी दिए । करिब एक घण्टा भएको छलफलमा ओलीले अदालतको निर्णय मान्ने र फैसला कार्यान्वयन गरेर जाने जानकारी गराएको उनले बताए ।
प्रचण्ड–नेपाल समूह कसरी अघि बढ्छ, सोहीअनुसार प्रधानमन्त्री अघि बढ्ने भट्टराई बताउँछन् । “अविश्वासको प्रस्ताव राख्छु भन्ने, प्रधानमन्त्रीलाई हटाउँछौं भन्ने कसरी अघि बढ्छन् । त्यसैअनुसार प्रधानमन्त्री अघि बढ्नुहुन्छ,’’ उनले भने ।
अन्य प्रदेशका सांसदहरुसँग पनि ओलीले छलफल गरिरहेका छन् । वाग्मती प्रदेशका सांसादहरुलाई ओलीले शनिबार बिहान ९ बजे बालुवाटार डाकेको सांसद शेरबहादुर तामाङले जानकारी दिए ।
