काठमाडौं । नेपाल कम्युनिस्ट पार्टी (नेकपा) पुष्पकमल दाहाल प्रचण्ड-माधवकुमार नेपाल पक्षको अखिल नेपाल महिला संघले महिला हिंसा र बलात्कारको विरोधमा राजधानीमा प्रदर्शन गरेको छ ।
अनेमसंघले प्रतिगमन, महिला हत्या, हिंसा र बलात्कारको विरोधमा आइतबार प्रदर्शन गरेको हो । शान्तिवाटिकामा जम्मा भएर महिलाहरुले नाराबाजीसहित वसन्तपुरसम्म र्याली गरेका थिए । नेकपा नेतृहरु अष्टलक्ष्मी शाक्य, शशि श्रेष्ठलगायतको उपस्थितिमा भएको प्रदर्शनमा महिला संघका नेता तथा कार्यकर्ताहरुको सहभागिता थियो ।
प्रदर्शनमा महिला हिंसा बन्द गर, बलात्कारीलाई कडाभन्दा कडा कारबाहीको व्यवस्था गर, महिला अधिकार सुनिश्चित गरलगायतका नाराबाजी गरिएको थियो । यस्तै ‘प्रतिगमन मुर्दावाद’, ‘संविधानको रक्षा गरौँ’, ‘निर्मला पन्तको हत्यारालाई कारबाही गर’, ‘भ्रष्टाचारीलाई कारबाही गर’, ‘बढ्दो महँगी नियन्त्रण गर’ लेखिएका प्लेकार्डसहित प्रदर्शन गरिएको थियो । प्रदर्शनकारीहरुले सूर्य चिह्न तथा हसियाँ हथौडा-अंकित झण्डासमेत बोकेका थिए ।
