काठमाडौं । कांग्रेसका सभापति शेरबहादुर देउवाले प्रतिनिधिसभा विघटनविरुद्धको सभाबाटै निर्वाचन आयोगसँग निर्वाचन तालिका मागेका छन् । प्रतिनिधिसभा विघटनविरुद्ध ७७ जिल्लामा विरोध कार्यक्रमअन्तर्गत बुटवलको सभाबाट देउवाले आयोगको गतिविधिले शंका पैदा गरेको बताए ।
“निर्वाचन आयोग अहिलेसम्म निर्वाचन कार्यक्रम किन बाहिर निकाल्दैन ? कि त कार्यक्रम ल्याउनुपर्यो हैन भने चुनाव गराउँदिन भन्नुपर्यो,” देउवाले भने, “संसद्को विघटन भएको ६ महिनाभित्र चुनाव गरिसक्नुपर्छ ।” देउवाले जेठभित्र जसरी पनि आयोगले चुनाव गराउनुपर्ने संवैधानिक बाध्यता रहेको बताए ।
जेठ अन्तिमसम्म जसरी पनि चुनाव गराउनुपर्ने भन्दै प्रधानमन्त्री ओली र निर्वाचन आयोग दुवैको निर्वाचन गराउने दायित्व रहेको बताए ।
“जेठभित्र जसरी पनि चुनाव गराउनुपर्छ । निर्वाचन आयोगको त्यही काम हो,” देउवाले भने, “निर्वाचन आयोग संविधान बाहिर जान सक्छ ? निर्वाचन आयोगलाई म यहीँबाट भन्न चाहन्छु- प्रधानमन्त्री ओलीले संसद् विघटन गरेको ६ महिनाभित्र चुनाव गराइसक्नुपर्छ ।”