काठमाडौं । नेपालमा आजदेखि कोरोनाभाइरसविरुद्धको खोप अभियान सुरु भएको छ । अग्रपंक्तिमा रहेर काम गरेका चार लाखभन्दा बढी स्वास्थ्यकर्मी, सुरक्षाकर्मी, सरसफाइ कर्मचारीलगायतलाई पहिलो चरणमा खोप लगाइँदै छ ।
आज सातवटै प्रदेशका ६२ वटा अस्पताल र १२० भन्दा बढी खोप केन्द्रबाट सुरु भएको खोप कार्यक्रमको पहिलो चरण १० दिनभित्र सकिने बताइएको छ । त्यसपछि दोस्रो चरणको अभियान सुरु हुनेछ ।
नेपालमा पहिलोपटक गत वर्षको माघ ९ गते एक पुरुषमा कोरोनाभाइरसको संक्रमण पुष्टि भएको थियो । चीनबाट सुुरु भएको कोरोना महामारीले विश्व आक्रान्त छ । नेपाल पनि कोरोना महामारीसँग जुधिरहेको छ ।
नेपालमा कोरोना संक्रमणको जोखिम बढेपछि सरकारले गत वर्षको चैत ११ गतेबाट लकडाउन गर्योे । झन्डै साढे चार महिना लकडाउन जारी रह्यो । तर, कोरोना कहर रोकिएन । लगातार संक्रमित र ज्यान गुमाउनेको दर बढ्दै गयो ।
गत माघदेखि यो माघको १२ गतेसम्मको अवधिमा कोरोना संक्रमणका कारण दुई हजार १७ जनाको मृत्यु भयो । यो अवधिमा दुई लाख ७० हजार ९२ जना संक्रमित भए । हालसम्म दुई लाख ६४ हजार ८२३ जना कोरोनामुक्त भएका छन् ।
पछिल्लो समय कोरोना संक्रमणको दर कम हुँदै गएको छ । संक्रमणको दर कम हुँदै गए पनि अझै जोखिम कायम रहेकाले स्वास्थ्य सावधानी अपनाउन चिकित्सकहरुले सुझाव दिँदै आएका छन् ।
नेपालमा आपत्कालीन प्रयोगका लागि अनुमति दिइएको खोप ‘कोभिसिल्ड’ अक्सफोर्ड विश्वविद्यालय र आस्ट्राजेनिकाले विकास गरेको हो । यसलाई भारतको सिरम इन्स्टिट्युट अफ इन्डियाले उत्पादन गरेको हो ।
तस्बिरः सुनील प्रधान/बाह्रखरी ।