काठमाडौं । प्रिमियर लिग फुटबलमा उपाधि दाबेदार चेल्सी पराजित भएको छ । मंगलबार राति भएको खेलमा चेल्सी उल्भ्ससँग पराजित भएको हो ।
उल्भ्सले घरेलु मैदानमा चेल्सीलाई २-१ ले पराजित गर्न सफल भएको हो । चेल्सीले सुरुवाती अग्रता जोगाउन नसक्दा पराजित हुन पुगेको हो । दुवै टोलीले खेलको दोस्रो हाफमा गोल गरेका हुन् । खेलको ४९औं मिनेटमा ओलिभर जिरुउडले गोल गर्दै पाहुना टोलीलाई अग्रता दिलाएका थिए ।
६६औं मिनेटमा घरेलु टोलीका लागि ड्यानियल पोडेन्सले गोल गर्दै खेल बराबरीमा ल्याए । खेलको इन्जुरी समयमा पेड्रो नेटोले गोल गर्दै उल्भ्सलाई २-१ गोलको जित दिलाए ।
चेल्सीको यो लगातार दोस्रो हार हो । पराजित भएसँगै चेल्सी १३ खेलबाट २२ अंक जोड्दै तालिकाको पाँचौं स्थानमा छ । उल्भ्सले २० अंक जोडेको छ । उल्भ्स लिगको १०औं स्थानमा छ ।