काठमाडौं । नेपालमा कोरोना संक्रमणबाट ज्यान गुमाउनेको संख्या ७५७ जना पुगेको छ । कोरोना कारण ज्यान गुमाउनेमा नेपालमा ५० वर्षभन्दा माथि उमेर समूहका धेरै छन् । 

स्वास्थ्य तथा जनसंख्या मन्त्रालयको सोमबार बेलुकासम्मको तथ्यांकअनुसार कोरोना संक्रमणका कारण सबैभन्दा बढी ५० वर्षभन्दा माथिका उमेर समुहका ५१८ जनाको मृत्यु भएको छ । जुन कुल कोरोनाका कारण मृत्यु भएका संक्रमितको ६८.४३ प्रतिशत हो । सोही उमेर समूहका पनि ६१ देखि ७० वर्ष उमेर समूहका १७६ जनाले कोरोनाका कारण ज्यान गुमाएको देखिन्छ । जुन ५० वर्षभन्दा माथिका उमेर समूहकै कोरोनाका कारण सबै बढी मृत्यु हुने उमेर समूह हो ।

यसैगरी, मन्त्रालयकै तथ्यांकअनुसार २० देखि ५० वर्ष उमेर समूहका मृत्यु हुनेको संख्या २२३ जना छ । जुन कुल मृत्युको २९.४६ प्रतिशत हो । उक्त उमेर समूहका पनि ४१ देखि ५० वर्ष उमेरका सबैभन्दा बढी १०३ जना छन् ।

कोरोना संक्रमणका कारण बालबालिको पनि मृत्यु भएको छ । ४९ दिनको शिशु देखि १८ वर्ष उमेर समूहका १६ जनाले कोरोनाकै कारण ज्यान गुमाएका छन् । जुन कुल मृत्युको २.१२ प्रतिशत हो ।

कोरोना संक्रमणपछि कडा निमोनियाँ, सुक्खा खोकी स्ट्रोकलगायत समस्या देखिएर ४९ जनाको ज्यान गएको मन्त्रालयले जनाएको छ ।

त्यसबाहेक पहिल्यै मुटु , मिर्गौलाका रोगी, उच्च रक्तचाप, निमोनियाँ, क्यान्सर तथा दमका रोगी, लामो समयदेखि सुक्खा खोकी, श्‍वासप्रश्‍वासमा समस्या, मधुमेह, नसासम्बन्धी समस्या रहेका व्यक्तिको कोरोना संक्रमणबाट मृत्यु भएको मन्त्रालयले जनाएको छ । कोरोना ज्यान गुमाउनेमा पुरुष ५३६ र महिला २२१ जना छन् ।

कुन उमेर समूहका कतिले ज्यान गुमाए 
 उमेर समूह           मृत्यु
०-१८         १६  
१९-३०           ३६
३१-४०            ८४
४१-५०             १०३
५१-६०              १३४
६१-७०              १७६
७१-८०              १२९
८१  भन्दा माथि     ७९

मन्त्रालयका प्रवक्ता डा. जागेश्‍वर गौतमले कोरोना संक्रमणबाट ज्यान गुमाउनेमा पनि ५० वर्षभन्दा माथिकै उमेर समूहका धेरै रहेको बताए । कोरोना संक्रमणको जोखिम अन्य उमेर समूहभन्दा पनि बढी ज्‍येष्‍ठ नागरिकलाई बढी रहेको हुँदा चाडपर्वमा उनीहरुलाई जोगाउनुपर्ने बताए । कोरोना संक्रमणबाट मृत्युग्राफ पनि ज्येष्‍ठ नागरिकै धेरै रहेकाले चाडबाड मनाउँदा सचेत भएर मनाउन पनि उनले आग्रह गरेका छन् ।

उपत्यकामा मात्र कोरोना संक्रमणबाट २५५ जनाको मृत्यु
काठमाडौं उपत्यकामा कोरोना संक्रमणका कारण २५५ जनाले ज्यान गुमाएका छन् । जुन कुल कोरोना संक्रमणबाट ज्यान गुमाउनेको ४५.७८ प्रतिशत हो ।

उपत्यकामा पनि कोरोनाका कारण ज्यान गुमाउनेमा काठमाडौं जिल्लामा १६२ जना छन् । जुन सबैभन्दा बढी कोरोनाबाट ज्यान गुमाउने जिल्ला पनि हो । ललितपुरमा ५० जना र भक्तपुरमा ४३ जनाले कोरोनाका कारण ज्यान गुमाएका मन्त्रालयले जनाएको छ ।