काठमाडौं । नेपाल प्रहरीका एसपी वसन्त रजौरे प्रहरी प्रधान कार्यालयमा रहेको कोरोना हेल्थ डेस्कमा कार्यरत छन् । कोरोनाविरुद्धको मोर्चामा सक्रिय रहँदा उनी आफैं संक्रमित बन्‍न पुगे ।

प्रहरी प्रधान कार्यालयमा कोरोना देखिएपछि संक्रमितको कन्ट्याक्ट ट्रेसिङमा उनी परेका थिए । १४ दिनको क्‍वारेन्टिन र १० दिनको आइसोलेसनमा बसेपछि उनी निको भएका छन् । एसपी रजौरेले बाह्रखरीसँग आफ्नो कोरोना अनुभव यसरी साटेका छन् ।

प्रहरी प्रधान कार्यालयमा रहँदा केही प्रहरी साथीहरुमा कोरोना देखियो । संक्रमितको कन्ट्याक्ट ट्रेसिङमा म पनि परें । त्यो क्रममा १४ दिन घरमै क्‍वारेन्टिन बसें । परीक्षणकै क्रममा मेरो पनि कोरोना पोजेटिभ आयो । मलाई ज्वरो आएको थिएन । तर दुई-तीनपटक हाच्छ्यु भने भएको थियो । नाक हल्का भारी भएको थियो ।

त्यसपछि मैले आफ्नै घरमा आइसोलेसनमा बस्‍ने बताए । चिकित्सकको सल्लाहमा घरमै बसें । तर घरमा आफ्ना कारणले बालबालिकालाई समस्या नपरोस् भन्‍नेमा म सचेत थिएँ । एउटा छुट्टै कोठामा बसें । आफ्नै दैनिक तालिका बनाएँ । खासै आत्तिएको त थिएन । तर आफूभन्दा परिवारको चिन्ता बढी थियो ।

प्रत्येक दिन बिहान सामान्य व्यायाम योगालगायत क्रियाकलाप गरें । खानपिन नियमित नै भयो । शारीरिक अभ्यास गरेर पसिना बगाउँथे । दिनमा दुई पटकसम्म तातोपानीको बाफ लिइरहें ।

बेसार पानी, टिमुर, अदुवा, लसुन, मेथी, ज्वानोको झोल निरन्तर पिएँ । स्वास्थ्यमा खासै समस्या देखिएको थिएन । तर आत्मविश्वास भने चाहिन्छ । सकेसम्म सतर्कता अपनाउने हो । संक्रमित भइसकेपछि पनि व्यायाम, खानपिनको सन्तुलन मिलाएर सकारात्मक मानसिकता कायम गर्ने हो भने कोरोनाविरुद्धको लडाइँ जित्‍न सकिन्छ । तर सानो लापरबाहीले घर परिवार र स्वयं आफू संकटमा परिन्छ भन्‍ने सबैले बुझ्‍न जरुरी छ ।

अहिले सबैतिर संक्रमण फैलिँदो क्रममा छ । त्यसैले हामी सबै सचेत हुन जरुरी छ । सरकारले तोकेका मापदण्ड, आग्रहलाई सकारात्मक रुपमा लिएर अगाडि बढ्न जरुरी छ । शंका लागे जाँच गराइहालौं । नौ दिन आइसोलेसनमा बसेपछि मेरो कोरोना रिपोर्ट नेगेटिभ आयो । अब म फेरि कोरोनाविरुद्धको लडाइँमा मैदान फर्किंदै छु । राज्य र समाजप्रतिको जिम्मेवारी हामी सबैले आ-आफ्नो ठाउँमा पूरा गरौं ।