काठमाडौं । सरकारले वैशाख १५ गतेसम्म लकडाउन लम्ब्याएसँगै थप कडाइ गर्ने नीति लिएको छ । सरकारले अत्यावश्यक कामबाहेक कोही पनि नागरिकलाई घरबाहिर निस्कन नदिने कदाचित् निक्लिएको भेटेमा कानुनी कारबाही गर्ने तयारी गरेको हो ।
कोरोना सङ्क्रमण रोकथाम तथा नियन्त्रण उच्चस्तरीय समन्वय समितिका संयोजक ईश्वर पोखरेलले लकडाउन थप कडा पार्ने बताएका हुन् ।
अत्यावश्यक काम बाहेक सडकमा बरालिएर हिँड्नेहरूलाई प्रहरीले सम्झाएर छाड्ने गरेको थियो । अब भने कानुनी कारबाही नै गर्ने उनले जानकारी दिए ।
“वैशाख १५ गतेसम्म लकडाउन कायम राख्ने निर्णय गरेका छौं,” बाह्रखरीसँग सङ्क्षिप्त कुराकानी गर्दै भने, “कडाइ गर्नै पर्यो नि ! उलङ्घन गर्नेप्रति सरकार निर्मम हुन्छ !”
काठमाडौं उपत्यकालगायत मुलुकका विभिन्न भागमा सङ्क्रमित फेला गरिरहेको बताउँदै उनले लापरवाही गर्न छुट नदिइने बताए ।
लकडाउन नै यसको हतियार भएको बताउँदै पोखरेलले थपे, “काठमाडौंमै पनि एकपछि अर्को केस थपिँदैछ । अहिले पनि मानिसहरू गतिछाडा भएर हिँड्छन, लकडाउनको पालना गराउनै प¥यो । सरकारको लागि होइन । नागरिकको जीवनरक्षा जुनसुकै मूल्य चुकाएर भए पनि गर्नुपर्छ ।”
लकडाउन उलङ्घन गर्नेलाई सङ्क्रामक रोग ऐन–२०२० बमोजिम कारबाही हुने सरकारले जानकारी दिएको छ । यो ऐन अन्तर्गतको कारबाही गर्ने जिम्मा प्रमुख जिल्ला अधिकारीको हुनेछ । यस ऐन अन्तर्गत दिइएको आदेशलाई अपहेलना गर्ने व्यक्तिलाई १ महिनासम्म कैद वा १०० रुपैयाँसम्म जरिबाना वा दुवै सजाय हुनेछ । अधिकृत व्यक्तिहरूलाई काममा बाधा पुर्याउनेलाई ६ महिनासम्म कैद वा ६०० सय रुपैयाँसम्म जरिबाना वा दुवै सजाय हुने व्यवस्था छ ।
मुलुकमा हालसम्म १६ जना सङ्क्रमित फेला परेका छन् । एकजना उपचारपछि घर फर्किइसकेका छन् । १५ जना विभिन्न अस्पतालमा उपचाररत छन् ।
