.jpeg)
ललितपुर । उमेदवारी दर्तासँगै ललितपुर महानगरपालिकाको मेयरका उमेदवारहरू चुनावी प्रचारमा खटिएका छन् । उनीहरूको एजेन्डा ललितपुर महानगरको एकीकृत विकास रहेको बताएका छन् ।
संविधानको कार्यान्वन शिक्षा, स्वास्थ्य र रोजगार आफ्नो एजेन्डा रहेको उमेदवारहरूको भनाइ छ ।
ललितपुर महानगरका लागि नेपाली कांग्रेस, (नेकपा) एमाले र माओवादी केन्द्रका मेयरहरूले समग्र ललितपुर महानगरको विकासमा आफ्नो उमेदवारी रहेको बताए ।
ट्राफिक जाम हटाउँछु : कांग्रेसबाट मेयर प्रत्यासी चिरिबाबु महर्जन
नेपाली कांग्रेस ललितपुरको ३ नं. वडामा दुईपटक अध्यक्ष निर्वाचित भइसकेका चिरिबाबु महर्जन ३ दशकदेखि कांग्रेसका तर्फबाट राजनतिमा सक्रिय रहेका छन् । महर्जनले ललितपुर महानगरपालिकाका लागि कांग्रेस मेयर प्रत्यासी चिरीबाबु महर्जनले मेयरमा आफ्नो विजयीपश्चात ललितपुर महानगरपालिकाका सडकमा रहेको ट्राफिक जामको समस्या पूर्ण रुपमा हटाउने प्रतिवद्धता व्यक्त गरे । यसका लागि जाम हुने चोकमा “फ्लाइ ओभर बनाइने छ ।” साथै उनले सरकारी विद्यालयअन्तर्गत रहेका शिशु कक्षा व्यवस्थित र निःशुल्क सञ्चालन गरिने बताएका छन् । साथै उनले संविधानको सफल कार्यान्वयनसँगै महानगरबासीको सम्पूर्ण समस्या सम्बोधन गरिने पनि प्रष्ट पारे । “ललितपुर महानगरपालिकामा बसोबास गर्ने सम्पूर्ण बासिन्दाका दैनिक जीवनसँग जोडिएका सडक, पुल, बाटोलगायत भौतिक पूर्वाधारको निर्माण र स्तरोन्नतिमा जोड दिनेछु” उनले भने । साथै उनले ललितपुरमा रहेका सांस्कृतिक सम्पदाको संरक्षण, संवद्र्धन र प्रवर्धन गरिने बताए । “भूकम्पले क्षति पुर्याएका सम्पदाहरुको पुनर्निर्माणको कामलाई प्राथमिकताकासाथ अगाडि बढाइने छ ।”
ललितपुर–काठमाडौं ट्राम बस चलाउँछु : एमालेबाट मेयर प्रत्यासी हरिकृष्ण व्यञ्जनकार
एमाले ललितपुरका अध्यक्ष व्यञ्जनकार २०३५ सालदेखि एमाले तर्फबाट राजनीतिमा सक्रिय छन् । २०४३ सालमै उनी ललितपुरको वडाध्यक्ष भएका थिए । एमालेतर्फबाट मेयर पदका प्रत्यासी हरिकृष्ण ब्यञ्जनकार आफू मेयरमा विजयी भए ५ वर्ष भित्रमा ललितपुरको गोदवारीदेखि काठमाडौंको बुढानिलकण्ठसम्मको दुरीमा ट्राम (इलेक्ट्रोनिक्स बस) सञ्चालन गरिने बताएका छन् । यसका लागि हाल भएका सडक सञ्जाल र पूर्वाधार विकास गरिने पनि ब्यञ्जनकारले बताए । उनले स्थानीय तहका जनताहरूलाई अधिकारसम्पन्न बनाउनका लागि आफूले मेयरमा उमेद्वारीमा मनोनयन दर्ता गराएको बताए । साथै उनले शिक्षा र स्वास्थ्य सेवाको उपलब्धतालाई गरिब जनताहरुको पहुँचसम्म पुर्याइने, अशक्त, अपाङ्ग र वृद्धवृद्धा भत्तामा थप सुविधा बढाइने । र समपूर्ण बेरोजगार युवालाई रोजगारीको सुनिश्चितता प्दान गरिने पनि बताए । “ललितपुर महानगरका स्वास्थ्य केन्द्रहरुलाई ५० देखि १०० शैयासम्मका हस्पिटलमा विकसित गर्ने मेरो भिजन छ,” उनले भने, “बेरोजगार युवाहरुलाई रोजगारीको सुनिश्चितताका साथै अशक्त, अपाङ्ग र वृद्धवृद्धाले पाउँदै आएको भत्तामा थप सुबिधा गरिने छ ।” त्यसैगरी उनले कक्षा १२ सम्मको पढाइ निःशुल्कसाथै विद्यार्थीलाई विद्यालयमा चिया, खाजाको व्यवस्थासमेत गरिने पनि बताए ।
गरिबका छोराछोरी कक्षा १२ सम्म निःशुल्क पढाइने : माओवादी केन्द्रबाट मेयर प्रत्यासी दिनेश महर्जन
माओवादीका पोलिटब्युरो सदस्य दिनेश महर्जन २०४८ सालबाट माओवादीका तर्फबाट राजनीतिमा सक्रिय छन् । जनमोर्चा हुँदै माओवादी केन्द्रमा प्रवेश गरेका हुन् । ललितपुर महानगरपालिका मेयर पदमा यहाँको उमेदवारी केका लागि ? भन्ने प्रश्नमा महर्जनले गणतन्त्र, संघीयता, समावेशिता र आसन्न स्थानीय तह निर्वाचनको खाका पनि माओवादीकै सक्रियताका कारण बनेको बताए । “मेयर पदका लागि मेरो उमेद्वारी पार्टीको यही एजेण्डालाई स्थानीय तहमा सफल कार्यान्वयनका लागि हो ।” साथै उनले धर्म निरपेक्षता र दलित समानताका मुद्दा पनि माओवादीकै बलमा आएको हुनाले स्थानीय स्तरमा कहीँकतै दलितहरूले दलित भएकै कारण समाजमा भेदभाव शोषण सहन नदिने र यसको कडा प्रतिकारमा उत्रन अधिकार सम्पन्न बनाइने पनि बताए । स्वास्थ्य र शिक्षाका क्षेत्रमा पनि थप विकास गरिने बताए । ललितपुरका ठाउँ–ठाउँमा १५ शैयाका हस्पिटल निर्माण गरिने त्यसैगरी गरिबका छोराछोरीलाई उच्च शिक्षासम्म निःशुल्क पढाइने पनि बताए ।
