टोक्यो । जापानका सम्राट नारुहितोले मंगलबार चरणबद्ध कार्यक्रमका बीच गद्दी आरोहण गर्दैछन् । ५९ वर्षीय उनले गएको मे महिनाबाट नै काम थालेका हुन् । तर, उनले आजबाट भने त्यसलाई विभिन्न विधि पुर्याएर औपचारिकता दिन लागका हुन् । उनको गद्दीआरोहण हालै जापानमा आँधीका कारण ८० जनाको मृत्यु भएर देश तंग्रिन नपाउँदै भइरहेको छ ।
उनी आज ६.५ मिटर उचाइको ताकामिकुरा गद्दीमा चढेर यसको औपचारिकता पूरा गर्ने छन् । सो कार्यक्रममा पुराना तरबार र गरगहनाहरुको समेत प्रदर्शन हुनेछ । ती सबैलाई सम्राटको शक्तिका रुपमा व्याख्या गर्ने गरिन्छ । ३० मिनेट लामो समारोहपछि सम्राटले मन्तव्य दिनेछन् । त्यसपछि प्रधानमन्त्री शिन्जो आबेले बधाई सम्बोधन गर्नेछन् । सो कार्यक्रममा भाग लिन १७० भन्दा बढी देशका प्रतिनिधिहरु गएका छन् ।
त्यसमा नेपालका राष्ट्रपति विद्या भण्डारीदेखि बेलायतका युवराज चार्ल्ससम्म रहेका छन् । विदेशी अतिथीलाई सम्राटले चिया पार्टीको पनि आयोजना गर्नेछन् । साँझ प्रधानमन्त्री आबेले रात्रिभोजको आयोजना गर्नेछन् । गद्धी आरोहण परेड भने नोभेम्बर १० तारेखसम्मका लागि स्थगित गरिएको छ । यसअघि सम्राट अकिहितोको गद्दी आरोहण कार्यक्रम सन् १९९० मा भएको थियो । त्यसपछि भएको यो अर्को समारोह हो । (बीबीसीमा आधारित)
